രാജ്യത്ത് ഒരു ലിറ്റര്‍ പെട്രോള്‍ വില 100 രൂപ കടന്നു ! എണ്ണ വില മൂന്നക്കം കടക്കുന്നത് ചരിത്രത്തിലാധ്യമായി. മധ്യപ്രദേശിലെ ഭോപാല്‍, അനുപ്പൂര്‍, ഷഹ്‌ദോല്‍ ജില്ലകളിലും മഹാരാഷ്ട്രയിലെ പര്‍ഭനി ജില്ലയിലും പ്രീമിയം പെട്രോളിന് 100 കടന്നു. സാധാരണ പെട്രോളിന്റെ വില രാജസ്ഥാനില്‍ നാളെ 100 കടക്കുമെന്നു സൂചന. കേരളത്തില്‍ അഞ്ചു ദിവസത്തിനകം പെട്രോള്‍ വില നൂറിലേക്ക് എത്തിയേക്കും

ഡല്‍ഹി:രാജ്യത്ത് പെട്രോള്‍ വില 100 രൂപ തൊട്ടു. മധ്യപ്രദേശിലെ ഭോപാല്‍, അനുപ്പൂര്‍, ഷഹ്‌ദോല്‍ ജില്ലകളിലും മഹാരാഷ്ട്രയിലെ പര്‍ഭനി ജില്ലയിലുമാണ് എണ്ണവില ചരിത്രത്തിലാദ്യമായി മൂന്നക്കം കടന്നത്.

പ്രീമിയം പെട്രോളിനാണ് ഈ വില. എണ്ണക്കമ്പനികളുടെ സംഘടനയായ ഒ എം സി തുടര്‍ച്ചയായ അഞ്ചാം ദിവസവും പെട്രോളിയം ഉല്‍പ്പന്നങ്ങളുടെ വില വര്‍ധിപ്പിച്ചിരുന്നു.

ഇന്നു രാവിലെയാണ് ഷഹ്‌ദോലിലും അനുപ്പൂരിലും പെട്രോള്‍വില സെഞ്ച്വറിയടിച്ചത്. ഇതിനു പിന്നാലെയായിരുന്നു ഭോപാലിലെ വിലക്കയറ്റം. അനുപ്പൂരില്‍ 102 രൂപയാണ് നിലവില്‍ പ്രീമിയം പെട്രോളിന്റെ വില.

നിലവില്‍ 99 രൂപ വിലയുള്ള രാജസ്ഥാന്‍ ആയിരിക്കും സാധാരണ പെട്രോള്‍വിലയില്‍ സെഞ്ച്വറിയടിക്കുന്ന ആദ്യ സംസ്ഥാനം എന്നാണ് സൂചന. തുടര്‍ച്ചയായി ആറു ദിവസങ്ങളില്‍ വിലവര്‍ധനയുണ്ടായ രാജസ്ഥാനില്‍ നാളെയോടെ വില 100-ലെത്തുമെന്നാണ് കരുതുന്നത്.

മഹാരാഷ്ട്രയും മധ്യപ്രദേശും ഡല്‍ഹിയുമടക്കമുള്ള സംസ്ഥാനങ്ങളില്‍ പ്രീമിയം പെട്രോളിനു പിന്നാലെ സാധാരണ പെട്രോളും ഉടന്‍ തന്നെ മൂന്നക്കം കടക്കുമെന്നാണ് സൂചന. 95 മുതല്‍ 98 രൂപ വരെയാണ് ഇവിടെ പെട്രോള്‍ വില.