ശ്രീനഗര്: സംസ്ഥാനത്ത് തീവ്രവാദികളുടെ എണ്ണം 250 ല് താഴെയായി കുറഞ്ഞതായി ജമ്മുകാഷ്മീര് പോലീസ് മേധാവി ദില്ബാഗ് സിംഗ്. കഴിഞ്ഞ രണ്ടു മാസത്തിനിടെ 25 ഭീകരരെ സുരക്ഷാസേന വധിച്ചെന്നും അദ്ദേഹം പറഞ്ഞു.
ഈ വര്ഷം ഇതുവരെ മൂന്ന് തീവ്രവാദികള് മാത്രമാണ് അതിര്ത്തിയിലൂടെ താഴ്വരയിലേക്ക് നുഴഞ്ഞുകയറിയതായി സ്ഥിരീകരിച്ചിട്ടുള്ളത്. കഴിഞ്ഞ നാളുകളേക്കാള് തീവ്രവാദികളുടെ എണ്ണം കുറഞ്ഞുവരികയാണ്. താഴ്വരയില് പ്രവര്ത്തനനിരതരായ 240-250 തീവ്രവാദികള് മാത്രമാണുള്ളത്. നുഴഞ്ഞുകയറിയ മൂന്നു പേരില് ഒരാളെ അടുത്തിടെ ത്രാലിലെ ഏറ്റുമുട്ടലില് വധിച്ചതായും അദ്ദേഹം പറഞ്ഞു.
ഈ വര്ഷം ഇതുവരെ വിജയകരമായ ഒരു ഡസന് ഓപ്പറേഷനുകള് നടത്താനായി. അതില് 10 എണ്ണം കാഷ്മീര് താഴ്വരയിലും രണ്ടെണ്ണം ജമ്മുവിലുമായിരുന്നു. ഈ ഓപ്പേറഷനുകളില് 25 തീവ്രവാദികളെ വധിച്ചു. ഒമ്ബത് തീവ്രവാദികളെ അറസ്റ്റ് ചെയ്തതായും പോലീസ് മേധാവി കൂട്ടിച്ചേര്ത്തു.