പി സി ഡബ്ലിയു എഫ് പത്താമത് സ്ത്രീധനരഹിത സമൂഹ വിവാഹം: സ്വാഗത സംഘം ഓഫീസ് പ്രവർത്തനം തുടങ്ങി

പൊന്നാനി: "സ്ത്രീത്വം, സമത്വം, നിർഭയത്വം" എന്ന ശീർഷകത്തിൽ 2022 ഡിസംബർ 31, ജനുവരി 1 (ശനി, ഞായർ) തിയ്യതികളിൽ പൊന്നാനി കൾച്ചറൽ വേൾഡ് ഫൗണ്ടേഷൻ (പി സി ഡബ്ല്യു എഫ്) വനിതാ വേദിയുടെ ആഭിമുഖ്യത്തിൽ പത്താമത് സ്ത്രീധനരഹിത സമൂഹ വിവാഹവും എട്ടാം വാർഷിക സമ്മേളനവും അരങ്ങേറുമെന്ന് വേദി ഭാരവാഹികൾ അറിയിച്ചു. എം ഇ എസ് പൊന്നാനി കോളേജ് ഓഡിറ്റോറിയത്തിൽ പ്രത്യേകം ഉയരുന്ന ഒ കെ ഉമ്മർ നഗറിലായിരിക്കും സമൂഹ വിവാഹവും വാർഷിക സമ്മേളനവും .

പരിപാടിയുടെ വിജയത്തിനായി ആവേശകരമായ പ്രവർത്തനങ്ങളാണ് പുരോഗമിച്ചു കൊണ്ടിരിക്കുന്നത്. ഇതിന്റെ ഭാഗമായി പ്രത്യേക സ്വാഗതസംഘം ഓഫീസ് പ്രവർത്തനം തുടങ്ങി. എം ഇ എസ് പൊന്നാനി കോളേജ് പ്രിൻസിപ്പൾ ഡോ: വി യു അമീറ ഓഫീസിന്റെ ഉദ്ഘടാനം നിർവ്വഹിച്ചു.

ചന്തപ്പടി എം എല്‍ എ ഓഫീസിന് മുൻവശമുളള പി സി ഡബ്ല്യു എഫ് കേന്ദ്ര കമ്മിറ്റി ഓഫീസ് കെട്ടിടത്തിലാണ് സ്വാഗത സംഘം ഓഫീസ് പ്രവര്‍ത്തിക്കുന്നത്.

സ്വാഗത സംഘം ചെയർപേഴ്സൺ ലത ടീച്ചർ ചടങ്ങിൽ അധ്യക്ഷത വഹിച്ചു. സി വി മുഹമ്മദ് നവാസ്, അടാട്ട് വാസുദേവൻ മാസ്റ്റർ, ഡോ. അബ്ദുറഹ്മാൻ കുട്ടി, ഇ ഹൈദറലി മാസ്റ്റർ, രാജൻ തലക്കാട്ട് തുടങ്ങിയവര്‍ ആശംസകൾ നേർന്നു.

ജനറൽ കൺവീനർ ടി മുനീറ സ്വാഗതവും, റംല കെ പി നന്ദിയും പറഞു.