കാശ്മീരിനെ വേറെ ഒരു രാജ്യമാക്കി ചോദ്യപേപ്പർ, വിവാദമുയരുന്നു: ചൈനയിലെ ജനങ്ങളെ ചൈനീസ് എന്ന് വിളിക്കുന്നതുപോലെ, നേപ്പാൾ, ഇംഗ്ലണ്ട്, കാശ്മീർ, ഇന്ത്യ എന്നിവിടങ്ങളിലെ ആളുകളെ എന്താണ് വിളിക്കുന്നത്’,എന്നാണ് ചോദ്യം

തിരുവനന്തപുരം: ബിഹാറിലെ ഒരു സ്‌കൂളിലെ ഏഴാം ക്ലാസ് ചോദ്യപേപ്പറിൽ കാശ്മീരിനെ വേറെ രാജ്യമായി സൂചിപ്പിക്കുന്ന ചോദ്യം ഉണ്ടായിരുന്നു എന്ന ആരോപണം പുതിയ വിവാ​ദത്തിന് കാരണമായിരിക്കുകയാണ്. ബിഹാർ വിദ്യാഭ്യാസ വകുപ്പ് 1 മുതൽ 8 വരെ ക്ലാസുകളിലെ വിദ്യാർത്ഥികൾക്കായി ഒക്ടോബർ 12 മുതൽ 18 വരെ മിഡ്‌ടേം പരീക്ഷകൾ നടത്തിയിരുന്നു. ഇങ്ങനെ നടത്തിയ ഏഴാം ക്ലാസ്സിലെ ഇം​ഗ്ലീഷ് പരീക്ഷയിലാണ് വിവാദമായ ചോദ്യം ഉള്ളത്.

‘ഇനിപ്പറയുന്ന രാജ്യങ്ങളിലെ ആളുകളെ എന്താണ് വിളിക്കുന്നത്? ഒന്ന് നിങ്ങൾക്കായി ചെയ്തിരിക്കുന്നു’ എന്നായിരുന്നു ചോദ്യങ്ങളുടെ തലക്കെട്ട്. ചൈനയുടെ ഉദാഹരണം ഉദ്ധരിച്ച് ‘ചൈനയിലെ ജനങ്ങളെ ചൈനീസ് എന്ന് വിളിക്കുന്നതുപോലെ, നേപ്പാൾ, ഇംഗ്ലണ്ട്, കാശ്മീർ, ഇന്ത്യ എന്നിവിടങ്ങളിലെ ആളുകളെ എന്താണ് വിളിക്കുന്നത്’ എന്നായിരുന്നു പിന്നാലെ വന്ന ചോദ്യങ്ങൾ. അരാരിയ, കിഷൻഗഞ്ച്, കതിഹാർ ജില്ലകളിലെ വിദ്യാർത്ഥികളോടാണ് ഈ ചോദ്യം ചോദിച്ചത് എന്നാണ് ആരോപണം.

“ഞങ്ങൾക്ക് ഈ ചോദ്യപേപ്പർ ബീഹാർ വിദ്യാഭ്യാസ ബോർഡിൽ നിന്ന് ലഭിച്ചതാണ്. കശ്മീരിലെ ജനങ്ങളെ എന്താണ് വിളിക്കുന്നതെന്ന് ചോദിക്കേണ്ടതായിരുന്നു. പക്ഷേ, അത് കാശ്മീർ രാജ്യത്തെ ആളുകളെ എന്താണ് വിളിക്കുന്നത് എന്ന് തെറ്റായി ചോദിച്ചിരിക്കുന്നു”. അധ്യാപകരിലൊരാൾ പറയുന്നു. ജില്ലാ വിദ്യാഭ്യാസ ഓഫീസർ സുഭാഷ് കുമാർ ഗുപ്ത വിഷയത്തെക്കുറിച്ച് മാധ്യമങ്ങളോട് സംസാരിക്കാൻ തയ്യാറായില്ല. അതേസമയം, സംഭവം ഗൂഢാലോചനയാണെന്ന് ആരോപിച്ച് വിദ്യാഭ്യാസ പ്രവർത്തകരും ബിജെപി നേതാക്കളും കേന്ദ്ര വിദ്യാഭ്യാസ മന്ത്രിയോട് അന്വേഷണം ആവശ്യപ്പെട്ടിട്ടുണ്ട്.