സ്പീക്കര്‍ എം ബി രാജേഷിന്റെ അസിസ്റ്റന്റ്​ പ്രൈവറ്റ്​ സെക്രട്ടറിയായി ചമഞ്ഞ് ജോലി തട്ടിപ്പ് നടത്തിയയാള്‍ പിടിയില്‍

തൃശൂര്‍: നിയമസഭാ സ്പീക്കര്‍ എം ബി രാജേഷിന്റെ അസിസ്റ്റന്റ്​ പ്രൈവറ്റ്​ സെക്രട്ടറിയാ​ണെന്ന വ്യാജേന ജോലി തട്ടിപ്പ് നടത്തിയയാള്‍ പിടിയിലായി. പാലക്കാട് സ്വദേശി പ്രവീണ്‍ ബാലചന്ദ്രനാണ്​ തൃശൂരില്‍ പിടിയിലായത്​. വടക്കാഞ്ചേരി അത്താണി മിണാലൂരിലെ ഫ്ലാറ്റില്‍നിന്നാണ് ഇയാള്‍ പിടിയിലായത്.

കോട്ടയത്താണ്​ ഇയാള്‍ക്കെതിരെ തട്ടിപ്പ് പരാതി വന്നത്. തട്ടിപ്പിന്​ ഇരയായ ഒരു യുവതി സ്​പീക്കറെ നേരിട്ട്​ ഫോണില്‍ വിളിച്ച്‌​ പറഞ്ഞതോടെയാണ്​ ഇത്തരമൊരു തട്ടിപ്പ്​ നടക്കുന്നതായി അറിഞ്ഞത്​. കോട്ടയത്തും പരിസരപ്രദേശങ്ങളിലും നിരവധി പേരില്‍നിന്ന്​ ഇയാള്‍ ​പണം കൈപ്പറ്റുന്നതായി അറിയാന്‍ സാധിച്ചിട്ടുണ്ടെന്ന്​ സ്​പീക്കറുടെ ഓഫീസ്​ പറഞ്ഞിരുന്നു.

പ്രവീണിനെതിരെ സ്പീക്കറുടെ ഓഫീസ് മുന്നറിയിപ്പ് നല്‍കിയിരുന്നു. ഡിജിപിക്ക്​ പരാതിയും നല്‍കിയിരുന്നു. അസിസ്റ്റന്റ് പ്രൈവറ്റ് സെക്രട്ടറിയായി നിയമനം ലഭിച്ചെന്ന ഇയാളുടെ വ്യാജ സന്ദേശവും പൊലീസിന് ലഭിച്ചു.