നാല് മത്സരങ്ങളുള്ള ടെസ്‌റ്റ് പരമ്പരയിലെ ജഡേജയുടെ പ്രകടനം വിസ്‌മയിപ്പിച്ചു, ജഡേജയെ പുകഴ്ത്തി സഞ്ജയ് മഞ്ജരേക്കർ

ഓസീസിനെതിരായ മികച്ച പ്രകടനത്തിന് പിന്നാലെ ഓൾറൗണ്ടർ രവീന്ദ്ര ജഡേജയെ പുകഴ്ത്തി മുൻ ഇന്ത്യൻ താരം സഞ്ജയ് മഞ്ജരേക്കർ. ഇന്ത്യൻ ടെസ്‌റ്റ് ടീമിലേക്കുള്ള തിരിച്ചുവരവിൽ അദ്ദേഹത്തിന്റെ ബൗളിംഗ് മികച്ചതായിരുന്നുവെന്ന് അദ്ദേഹം പറഞ്ഞു. ബോർഡർ-ഗവാസ്‌കർ ട്രോഫി ഇന്ത്യ 2-1ന് നേടിയപ്പോൾ സ്‌പിൻ ബൗളിംഗ് പങ്കാളിയായ രവിചന്ദ്രൻ അശ്വിനൊപ്പം ജഡേജ പരമ്പരയിലെ താരമായി ആയി തിരഞ്ഞെടുക്കപ്പെട്ടിരുന്നു.

നാല് മത്സരങ്ങളുള്ള ടെസ്‌റ്റ് പരമ്പരയിലെ ജഡേജയുടെ പ്രകടനം വിസ്‌മയിപ്പിച്ചുവെന്ന് മഞ്ജരേക്കർ പറഞ്ഞു. ഒരു ടേണിംഗ് ട്രാക്കിൽ മികച്ച നിലയിൽ പന്തെറിയാൻ ജഡേജയുടെമേൽ കടുത്ത സമ്മർദ്ദം ഉണ്ടായിരുന്നുവെന്ന് അദ്ദേഹം ചൂണ്ടിക്കാട്ടി. അഞ്ച് മാസത്തോളം അന്താരാഷ്ട്ര ക്രിക്കറ്റിൽ നിന്ന് വിട്ടുനിന്ന ജഡേജ ഓസ്‌ട്രേലിയക്കെതിരായ ഇന്ത്യയുടെ ടെസ്‌റ്റ് പരമ്പരയിലൂടെയാണ് തിരിച്ചെത്തിയത്.

"അദ്ദേഹം ഇതിനായി ഒരുപാട് പന്തെറിഞ്ഞിട്ടുണ്ടെന്ന് ഞാൻ കേട്ടു, പക്ഷേ ടെസ്‌റ്റ് മാച്ച് സമ്മർദ്ദം വ്യത്യസ്‌തമാണ്, നിങ്ങൾക്ക് മുന്നിൽ ഒരു റാങ്ക് ടേണർ ഉള്ളപ്പോൾ സമ്മർദ്ദം വ്യത്യസ്‌തമായിരിക്കും. അതിനാൽ അവിടെ വിക്കറ്റ് വീഴ്ത്തുമെന്ന് പ്രതീക്ഷിക്കും." മഞ്ജരേക്കർ ചൂണ്ടിക്കാട്ടി.

ജഡേജയുടെ ബൗളിംഗ് വിക്കറ്റ് വീഴ്ത്താൻ ഏറ്റവും അനുയോജ്യമാണെന്ന് മഞ്ജരേക്കർ പറഞ്ഞു, ആദ്യ ടെസ്‌റ്റിലെ ജഡേജയുടെ പ്രകടനം ഇന്ത്യയ്ക്ക് നിർണായകമാണെന്ന് അദ്ദേഹം തറപ്പിച്ചു പറഞ്ഞു. പരമ്പരയിലെ ആദ്യ മത്സരത്തിൽ ഓസ്‌ട്രേലിയയെ ഇന്നിംഗ്‌സിനും 132 റൺസിനും ഇന്ത്യ പരാജയപ്പെടുത്തിയപ്പോൾ നാഗ്‌പൂരിൽ ജഡേജ 70 റൺസ് നേടിയിരുന്നു.

"അദ്ദേഹത്തിന്റെ ബൗളിംഗ് അത്തരം പിച്ചുകൾക്ക് തികച്ചും അനുയോജ്യമാണ്, അത് അദ്ദേഹം തെളിയിച്ചു. ആദ്യ ടെസ്‌റ്റിൽ അദ്ദേഹം റൺസ് നേടിയ രീതിയും മികച്ചതായിരുന്നു. അക്‌സർ പട്ടേലിന്റെ കുതിപ്പിന് മുമ്പ് ജഡേജയുടെ ഒരു സുപ്രധാന ഇന്നിംഗ്‌സ് ആയിരുന്നു ഇത്" മഞ്ജരേക്കർ പറഞ്ഞു.

ജഡേജ തന്റെ തിരിച്ചുവരവിൽ ഉജ്ജ്വലമായി ബൗൾ ചെയ്‌തുവെന്നും താരത്തിന്റെ ബാറ്റിംഗും ഇന്ത്യയ്ക്ക് ഏറെ നിർണായകമായെന്നും മഞ്ജരേക്കർ പറഞ്ഞു, പ്രത്യേകിച്ച് പരമ്പരയിലെ ആദ്യ ടെസ്‌റ്റിൽ. അതേസമയം, ഈ വർഷത്തെ ബോർഡർ ഗവാസ്‌കർ പരമ്പരയിൽ ജഡേജ 135 റൺസും 22 വിക്കറ്റുകളുമാണ് ആകെ നേടിയത്. അശ്വിനൊപ്പം പരമ്പരയുടെ താരമായും ജഡേജ തിരഞ്ഞെടുക്കപ്പെട്ടിരുന്നു.