നരെയ്‌നും സാള്‍ട്ടും തുടങ്ങിവച്ചു, വെങ്കടേഷും ശ്രേയസും ഭംഗിയായി പൂര്‍ത്തിയാക്കി; ചിന്നസ്വാമിയില്‍ കൊല്‍ക്കത്ത് നൈറ്റ് റൈഡേഴ്‌സിന് കിടിലന്‍ ജയം; ആര്‍സിബിക്ക് 'ഹോം ഗ്രൗണ്ടി'ല്‍ കാലിടറി

ബെംഗളൂരു: ഇന്ത്യന്‍ പ്രീമിയര്‍ ലീഗില്‍ ഇന്ന് നടന്ന മത്സരത്തില്‍ കൊല്‍ക്കത്ത നൈറ്റ് റൈഡേഴ്‌സ് റോയല്‍ ചലഞ്ചേഴ്‌സ് ബെംഗളൂരുവിനെ ഏഴ് വിക്കറ്റിന് തോല്‍പിച്ചു. സ്‌കോര്‍: ആര്‍സിബി-20 ഓവറില്‍ ആറു വിക്കറ്റിന് 182. കെകെആര്‍-16.5 ഓവറില്‍ മൂന്ന് വിക്കറ്റിന് 186

പുറത്താകാതെ 59 പന്തില്‍ 83 റണ്‍സെടുത്ത വിരാട് കോഹ്ലിയാണ് ആര്‍സിബിയുടെ ടോപ് സ്‌കോറര്‍. കാമറൂണ്‍ ഗ്രീന്‍ 21 പന്തില്‍ 33 റണ്‍സും, ഗ്ലെന്‍ മാക്‌സ്വെല്‍ 19 പന്തില്‍ 28 റണ്‍സും എടുത്തു. മറ്റ് ബാറ്റര്‍മാര്‍ നിരാശപ്പെടുത്തി. അവസാന ഓവറുകളില്‍ ദിനേശ് കാര്‍ത്തിക്ക് നടത്തിയ വെടിക്കെട്ട് ബാറ്റിംഗാണ് ആര്‍സിബിയെ മികച്ച സ്‌കോറിലെത്തിച്ചത്. താരം എട്ട് പന്തില്‍ 20 റണ്‍സെടുത്തു. കൊല്‍ക്കത്തയ്ക്കു വേണ്ടി ഹര്‍ഷിത് റാണയും, ആന്ദ്രെ റസലും രണ്ട് വിക്കറ്റും വീഴ്ത്തി.

മറുപടി ബാറ്റിംഗിന് ഇറങ്ങിയ കൊല്‍ക്കത്തയ്ക്ക് ഓപ്പണര്‍മാരായ സുനില്‍ നരെയ്‌നും (22 പന്തില്‍ 47), ഫില്‍ സാള്‍ട്ടും (20 പന്തില്‍ 30) തകര്‍പ്പന്‍ തുടക്കമാണ് സമ്മാനിച്ചത്. വെങ്കടേഷ് അയ്യര്‍ (30 പന്തില്‍ 50), ശ്രേയസ് അയ്യര്‍ (പുറത്താകാതെ 24 പന്തില്‍ 39) എന്നിവരും തിളങ്ങി. ഇത്തവണ ഐപിഎല്ലിലെ ആദ്യ ഒമ്പത് മത്സരങ്ങളും വിജയിച്ചത് ഹോം ടീമായിരുന്നു. എന്നാല്‍ ആര്‍സിബിയെ ആ ഭാഗ്യം തുണച്ചില്ല.