ഇത് എന്റെ അവസാന ടി20 ലോകകപ്പ്; യുവതാരങ്ങള്‍ക്ക് വേണ്ടി വഴിമാറുന്നു: പ്രഖ്യാപിച്ച് വിരാട് കോഹ്ലി

ബാര്‍ബഡോസ്: ഇത് തന്റെ അവസാന ടി20 ലോകകപ്പാണെന്ന് ഇന്ത്യന്‍ താരം വിരാട് കോഹ്ലി. ടി20 ലോകകപ്പ് ഫൈനലില്‍ ദക്ഷിണാഫ്രിക്കയെ പരാജയപ്പെടുത്തിയശേഷം പ്രതികരിക്കുകയായിരുന്നു അദ്ദേഹം. യുവതാരങ്ങള്‍ക്ക് വേണ്ടി വഴിമാറുന്നുവെന്നായിരുന്നു കോഹ്ലിയുടെ പ്രതികരണം.  ഇന്ത്യയ്ക്കുവേണ്ടിയുള്ള തൻ്റെ അവസാന ടി20 മത്സരമാണിതെന്ന് മാൻ ഓഫ് ദ മാച്ച് അവാർഡ് നേടിയ ശേഷം കോഹ്ലി പറഞ്ഞു.

“ഇത് എൻ്റെ അവസാന ടി20 ലോകകപ്പായിരുന്നു, ഞങ്ങൾ നേടാൻ ആഗ്രഹിച്ചത് ഇതാണ്. ഇന്ത്യക്കായി കളിക്കുന്ന എൻ്റെ അവസാന ടി20 മത്സരമായിരുന്നു ഇത്. ആ കപ്പ് ഉയർത്താൻ ഞങ്ങൾ ആഗ്രഹിച്ചു, ”അദ്ദേഹം പറഞ്ഞു.

ടൂര്‍ണമെന്റിലുടനീളം മോശം ഫോം പുലര്‍ത്തിയിരുന്ന കോഹ്ലി, ഫൈനലില്‍ മികച്ച പ്രകടനമാണ് കാഴ്ചവച്ചത്. 59 പന്തില്‍ 76 റണ്‍സെടുത്ത കോഹ്ലിയാണ് ഇന്ത്യയുടെ ടോപ് സ്‌കോറര്‍. കലാശപ്പോരാട്ടത്തില്‍ ഇന്ത്യ വിജയം നേടിയതില്‍ കോഹ്ലിയുടെ പ്രകടനവും നിര്‍ണായകമായി.