സോഷ്യല്‍ മീഡിയാ ഉപയോഗിക്കുന്നവര്‍ ഇപ്പോള്‍ ഇതു ചെയ്താല്‍ ഭാവിയില്‍ ദുഖിക്കേണ്ടി വരില്ല !

സാമൂഹ്യമാധ്യമങ്ങള്‍ നമ്മുടെ ജീവിതത്തിന്റെ തന്നെ ഭാഗമായി കഴിഞ്ഞു. ഇന്നു സോഷ്യല്‍ മീഡിയായില്‍ അക്കൗണ്ടില്ലാത്ത ഒരാളെന്നു കേട്ടാല്‍ മൂക്കത്ത് വിരല്‍ വയ്ക്കുന്നവരും ഉണ്ട്.

കോവിഡിന്‍റെയും ലോക്ക്ഡൗണിന്റെയുമൊക്കെ കാലത്ത് സോഷ്യല്‍മീഡിയ ഉപഭോഗം മുമ്പെന്നത്തേക്കാളും വര്‍ധിച്ചിട്ടുമുണ്ട്. സുഹൃത്തുക്കളുമായും ബന്ധുക്കളുമായും ബന്ധപ്പെടാനായി മിക്കവരും സോഷ്യല്‍മീഡിയയെയാണ് ഉപയോഗിക്കുന്നത്.

ഇതോടെ തട്ടിപ്പുകളുടെ കേന്ദ്രമായും ഇപ്പോള്‍ സാമൂഹ്യമാധ്യമങ്ങള്‍ മാറിയിട്ടുണ്ട്. അതുകൊണ്ടുതന്നെ സാമൂഹ്യമാധ്യമങ്ങള്‍ ഉപയോഗിക്കുമ്പോള്‍ ചില കാര്യങ്ങള്‍ പ്രത്യേകം ശ്രദ്ധിക്കണം.

സോഷ്യല്‍ മീഡിയാ ഉപയോഗിക്കുന്നവര്‍ പലവിധമാണ്. അതുകൊണ്ടുതന്നെ നമ്മുടെ വ്യക്തിഗത വിവരങ്ങള്‍ രഹസ്യമാക്കി വയ്ക്കുകയാണ് ഉത്തമം.

വിലാസം, ഫോണ്‍ നമ്പര്‍, ആധാര്‍ നമ്പര്‍, ചിത്രങ്ങള്‍, ജനന തിയതി തുടങ്ങിയ സ്വകാര്യ വിവരങ്ങള്‍ വളരെ സൂക്ഷിച്ചു മാത്രമേ പങ്കുവെക്കാവൂ. ഇത്തരം വിവരങ്ങള്‍ സോഷ്യല്‍മീഡിയയില്‍ തട്ടിപ്പു നടത്തുന്നവര്‍ക്ക് ഏറെ ഉപകാരപ്രദമാണ്.

സ്വന്തം അക്കൗണ്ടുകളിലൂടെ വീഡിയോകളും ചിത്രങ്ങളും പങ്കുവെക്കുകയാണെങ്കില്‍ തന്നെ നിങ്ങളുടെ സുഹൃത്തുക്കള്‍ക്ക് മാത്രം കാണാവുന്ന രീതിയിലാണ് നല്ലത്. പ്രൈവസി സെറ്റിംഗ്സില്‍ പോയാല്‍ ആവശ്യമായ മാറ്റങ്ങള്‍ ഇതിനായി വരുത്താനാകും.

അപരിചിതരില്‍ നിന്നുള്ള ഫ്രണ്ട്സ് റിക്വസ്റ്റുകള്‍ സ്വീകരിക്കുമ്പോള്‍ സൂക്ഷിക്കണം. ഇല്ലെങ്കില്‍ അത് ഭാവിയില്‍ കെണിയിലേക്കുള്ള വഴിയാകാം.

മറ്റൊരു പ്രധാനപ്പെട്ട കാര്യം യഥാര്‍ഥ ജീവിതത്തിലുള്ള സുഹൃത്തുക്കളെ പോലെ ഒരിക്കലും ഓണ്‍ലൈന്‍ സുഹൃത്തുക്കളെ വിശ്വസിക്കരുത്. നിരവധി സൈബര്‍ ക്രിമിനലുകള്‍ സോഷ്യല്‍മീഡിയ അക്കൗണ്ടുകള്‍ വഴിയാണ് പല തട്ടിപ്പുകളും നടത്തുന്നത് എന്ന കാര്യം ഓര്‍മ്മിക്കണം.

നിങ്ങളുടെ വിശ്വാസ്യത നേടിയെടുക്കാനും വിവരങ്ങള്‍ തട്ടാനുമൊക്കെ തട്ടിപ്പ് പ്രൊഫൈലുകള്‍ വഴി ശ്രമിച്ചേക്കാം. അതുകൊണ്ടുതന്നെ നേരിട്ട് പരിചയമില്ലാത്ത ഫ്രണ്ട്സ് റിക്വസ്റ്റുകള്‍ ഒഴിവാക്കുന്നതാണ് നല്ലത്.

സോഷ്യല്‍ മീഡിയാ ഉപയോഗിക്കുന്നവര്‍ ഒരു കാര്യം പ്രത്യേകം ഓര്‍ക്കുക. ഏതെങ്കിലും വിധത്തിലുള്ള സൈബര്‍ തട്ടിപ്പുകള്‍ക്ക് ഇരയായാല്‍ ആദ്യം തന്നെ സുഹൃത്തുക്കളേയോ ബന്ധുക്കളേയോ രക്ഷിതാക്കളേയോ അറിയിക്കുക.

സമയം പാഴാക്കാതെ പൊലീസിലും നാഷണല്‍ സൈബര്‍ ക്രൈം റിപ്പോര്‍ട്ടിംഗ് പോര്‍ട്ടലിലും പരാതി നല്‍കുക. തട്ടിപ്പുകാരുമായുള്ള എല്ലാവിധ സംഭാഷണങ്ങളും ചാറ്റുകളും ശേഖരിക്കണം. ഇത് ഭാവിയിലെ തെളിവുകളാണെന്ന കാര്യവും മറക്കരുതേ…