പിണറായി വിജയനും എം.വി.ഗോവിന്ദനുമെല്ലാം വല്ലാതെ കഷ്ടപ്പെടും: കെ.സുധാകരനെതിരെ സിപിഎമ്മും പിണറായി സർക്കാരും നടത്തുന്ന വേട്ടയ്ക്ക് കോൺഗ്രസിനെയും സുധാകരനെയും കിട്ടില്ല; ആരെങ്കിലും കള്ളക്കേസെടുത്താൽ രാജിവയ്ക്കാനുള്ളതല്ല കെപിസിസി പ്രസിഡന്റ് സ്ഥാനമെന്ന് കെ.സി.വേണുഗോപാൽ

തിരുവനന്തപുരം: ആരെങ്കിലും കള്ളക്കേസെടുത്താൽ രാജിവയ്ക്കാനുള്ളതല്ല കെപിസിസി പ്രസിഡന്റ് സ്ഥാനമെന്ന് കോൺഗ്ര് സംഘടനാകാര്യ ജനറൽ സെക്രട്ടറി കെ.സി.വേണുഗോപാൽ. വ്യാജ പുരാവസ്തു കേസിൽ അറസ്റ്റ് ചെയ്തതിന്റെ പശ്ചാത്തലത്തിൽ വേണമെങ്കിൽ കെപിസിസി അധ്യക്ഷ സ്ഥാനം ഒഴിയാനും തയാറാണെന്ന് സുധാകരൻ പറഞ്ഞതിനോടു പ്രതികരിക്കുകയായിരുന്നു വേണുഗോപാൽ.

കെ.സുധാകരനെതിരെ സിപിഎമ്മും പിണറായി സർക്കാരും നടത്തുന്ന വേട്ടയ്ക്ക് കോൺഗ്രസിനെയും സുധാകരനെയും കിട്ടില്ല. സുധാകരനുവേണ്ടിയുള്ള പോരാട്ടം സർക്കാരിനെതിരെ കോൺഗ്രസ് നടത്തുന്ന പോരാട്ടമാണ്. കോൺഗ്രസ് ഈ പോരാട്ടവുമായി ശക്തമായി മുന്നോട്ടു പോകുമെന്നും അദ്ദേഹം അറിയിച്ചു.

കെ.സുധാകരന് എതിരെ പൊലീസ് കെട്ടിച്ചമച്ച കേസ് കോടതിയിൽ എത്തുമ്പോൾ തള്ളിപ്പോകുമെന്ന് മുതിർന്ന കോൺഗ്രസ് നേതാവ് എ.കെ. ആന്റണി പറഞ്ഞു. ആ ഘട്ടത്തിൽ പിണറായി വിജയനും എം.വി.ഗോവിന്ദനുമെല്ലാം വല്ലാതെ കഷ്ടപ്പെടും. എല്ലാ പ്രതിസന്ധികളേയും അതിജീവിച്ച് പാർട്ടി ഒറ്റക്കെട്ടായി നീങ്ങുമെന്നും അദ്ദേഹം ഇന്ദിരാഭവനിൽ പറഞ്ഞു.