ട്വിറ്റർ ബ്ലൂ ഇന്ത്യയിലും ആരംഭിച്ചു; പ്രതിമാസം 900 രൂപ വരെ ഫീസ്

മൈക്രോ ബ്ലോഗിംഗ് പ്ലാറ്റ്‌ഫോമായ ട്വിറ്റർ ഇന്ത്യയിലും സബ്‌സ്‌ക്രിപ്‌ഷൻ സേവനം ആരംഭിച്ചു. ട്വിറ്റർ ബ്ലൂ സേവനത്തിന് ഇന്ത്യയിൽ 650 രൂപ മുതലാണ് ഫീസ് ആരംഭിക്കുന്നത്. ട്വിറ്റർ ബ്ലൂവിന് വേണ്ടി വെബ് ഉപയോക്താക്കൾ പ്രതിമാസം 650 രൂപ നൽകണം. മൊബൈൽ ഉപയോക്താക്കൾക്ക് ഇത് പ്രതിമാസം 900 രൂപയാണ്.

കഴിഞ്ഞ വർഷം 44 ബില്യൺ ഡോളറിന് എലോൺ മസ്‌ക് ട്വിറ്റർ സ്വന്തമാക്കിയിരുന്നു. അതിനുശേഷം അദ്ദേഹം മൈക്രോ ബ്ലോഗിംഗ് പ്ലാറ്റ്‌ഫോമിൽ ഒരുപാട് മാറ്റങ്ങൾ വരുത്തി. ഇലോൺ മസ്‌ക് അടുത്തിടെ ട്വിറ്റർ ബ്ലൂ സേവനവും പ്രഖ്യാപിച്ചിരുന്നു. ഇതിന് കീഴിൽ, ട്വിറ്ററിന്റെ ചില അധിക സേവനങ്ങൾക്ക് നിങ്ങൾ ചാർജ് നൽകേണ്ടിവരും.

അടുത്തിടെ അമേരിക്ക, ബ്രിട്ടൻ, കാനഡ, ഓസ്‌ട്രേലിയ, ന്യൂസിലാൻഡ്, ജപ്പാൻ തുടങ്ങിയ രാജ്യങ്ങളിൽ ട്വിറ്റർ ബ്ലൂ സേവനം ആരംഭിച്ചിരുന്നു. ഈ രാജ്യങ്ങളിൽ, ട്വിറ്ററിന്റെ ബ്ലൂ സബ്‌സ്‌ക്രിപ്‌ഷൻ നിരക്ക് വെബ് ഉപയോക്താക്കൾക്ക് പ്രതിമാസം 8 ഡോളറാണ്. വാർഷിക സബ്‌സ്‌ക്രിപ്‌ഷൻ എടുക്കുന്നതിന് 84 ഡോളറും ചെലവഴിക്കേണ്ടിവരും. ആൻഡ്രോയിഡ് ഉപയോക്താക്കളിൽ നിന്ന് 3 ഡോളർ അധികം ഈടാക്കി ട്വിറ്റർ ഗൂഗിളിന് കമ്മീഷൻ നൽകുമെന്നും അറിയിച്ചിട്ടുണ്ട്.

ഈ സേവനമാണ് ഇപ്പോൾ ഇന്ത്യയിലും ആരംഭിച്ചിരിക്കുന്നത്. ഇന്ത്യയിൽ ട്വിറ്റർ ബ്ലൂ സേവനം സ്വീകരിക്കുന്നതിന് വെബ് ഉപയോക്താക്കൾ 650 രൂപയും, മൊബൈൽ ഉപയോക്താക്കൾ 900 രൂപയും നൽകണമെന്നാണ് റിപ്പോർട്ടുകൾ. വാർഷിക വരിസംഖ്യ എടുക്കുന്നതിന് 6800 രൂപ നൽകേണ്ടിവരും.

ട്വിറ്റർ ബ്ലൂവിൽ ലഭ്യമായ ഫീച്ചറുകൾ 

ട്വിറ്റർ ബ്ലൂ സബ്‌സ്‌ക്രിപ്‌ഷനോടൊപ്പം, ഉപയോക്താക്കൾക്ക് ഒരു ബ്ലൂ ചെക്ക്‌മാർക്ക് അല്ലെങ്കിൽ ടിക്ക് നൽകുന്നു. ഇതോടെ, ട്വീറ്റുകൾ എഡിറ്റ് ചെയ്യാനും 1080 ഫോർമാറ്റിൽ വീഡിയോ അപ്‌ലോഡ് ചെയ്യാനുമുള്ള ഓപ്ഷൻ ഉപയോക്താക്കൾക്ക് ലഭ്യമാവും.

ഇതുകൂടാതെ, ട്വിറ്റർ ഉപയോക്താക്കൾക്ക് കുറച്ച് പരസ്യങ്ങൾ മാത്രമേ ദൃശ്യമാകൂ എന്നതും ശ്രദ്ധേയമാണ്, ബ്ലൂ വരിക്കാരല്ലാത്തവർക്ക് വരും കാലത്ത് കൂടുതൽ പരസ്യങ്ങൾ കാണേണ്ടി വരും എന്നാണ് സൂചന. ഇത് കൂടാതെ സേവനം ഉപയോഗിക്കുന്ന ഉപയോക്താക്കൾക്ക് 4000 ക്യാരക്‌ടറുകൾ വരെ നീളുന്ന ട്വീറ്റുകൾ പോസ്‌റ്റ് ചെയ്യാനും കഴിയും.