ട്രംപിന്റെ പ്രസ്താവന ഏറ്റു; അമേരിക്കക്കാര്‍ ഗൂഗിളില്‍ ഏറ്റവും കൂടുതല്‍ തിരഞ്ഞത് ഈ വാക്ക്‌

വാഷിംഗ്ടണ്‍: കൊറോണ വൈറസിനെ നശിപ്പിക്കാന്‍ അണുനാശിനി കുത്തിവയ്ക്കാനും ശക്തിയേറിയ പ്രകാശം ഉപയോഗിച്ച് വൈറസിനെ കൊല്ലാന്‍ ഗവേഷണം നടത്തണമെന്നുമുള്ള അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന്റെ പ്രസ്താവന ഏറെ വിമര്‍ശനങ്ങള്‍ക്കും പരിഹാസങ്ങള്‍ക്കും ഇടയാക്കിയിരുന്നു.

ട്രംപിന്റെ ഈ പ്രസ്താവന കൊണ്ടായിരിക്കാം അമേരിക്കക്കാര്‍ ഗൂഗിളില്‍ ഏറ്റവും കൂടുതല്‍ തിരയുന്നത് അണുനാശിനിയെക്കുറിച്ചാണ്.

'ഡിസ്ഇന്‍ഫെക്ടന്റ്' എന്ന വാക്ക് അമേരിക്കയില്‍ ഗൂഗിളില്‍ സെര്‍ച്ച് ചെയ്തത് നിരവധി പേരാണെന്ന് കണക്കുകള്‍ വ്യക്തമാക്കുന്നു. ഏപ്രില്‍ 25ഓടെ ഈ വാക്കിന് ഗൂഗിള്‍ സെര്‍ച്ചില്‍ വന്‍ കുതിച്ചുകയറ്റമാണുണ്ടായത്.

എന്താണ് അണുനാശിനി, അണുനാശിനിയില്‍ അടങ്ങിയിരിക്കുന്നത് എന്തൊക്കെ, അണുനാശിനിയും വാക്‌സിനും എന്നിങ്ങനെ പോകുന്ന പ്രധാന ഗൂഗിള്‍ സെര്‍ച്ചുകള്‍.
അണുനാശിനി ഉപയോഗിച്ച് വൈറസിനെ കൊല്ലാന്‍ സാധിക്കുമോ എന്ന് അന്വേഷിക്കുന്നവരുമുണ്ട്.

ട്രംപിന്റെ അള്‍ട്രാവയലറ്റ് രശ്മികളെക്കുറിച്ചുള്ള പരാമര്‍ശത്തിന്റെ അടിസ്ഥാനത്തില്‍ ഓസോണ്‍ തെറാപ്പി, ഓസോണ്‍ ഒരു അണുനാശിനിയാണോ തുടങ്ങിയവ അന്വേഷിക്കുന്നവരുമുണ്ട്.