ന്യൂഡല്ഹി: രാഷ്ട്രീയ പാര്ട്ടികളും വ്യവസായ ഗ്രൂപ്പുകളും പത്രങ്ങള് ആരംഭിക്കുന്നത് അവരവരുടെ സ്ഥാപിത താത്പര്യങ്ങള് അവതരിപ്പിക്കാനാണെന്ന ആരോപണം ഉയര്ത്തി ഉപരാഷ്ട്രപതി എം. വെങ്കയ്യ നായിഡു.
ഇത്തരം പത്രങ്ങള് മാധ്യമപ്രവര്ത്തനത്തിന്റെ മൂല്യങ്ങള് തന്നെ ഇല്ലാതാക്കുകയാണെന്നും ദേശീയ മാധ്യമ ദിനത്തില് പ്രസ് കൗണ്സില് ഓഫ് ഇന്ത്യ സംഘടിപ്പിച്ച ചടങ്ങില് അദ്ദേഹം പറഞ്ഞു.
ഇന്നത്തെ കാലത്ത് ഏതെങ്കിലും ഒരു രാഷ്ട്രീയ പാര്ട്ടി പത്രമോ ചാനലോ ആരംഭിക്കുന്നത് അവരുടെ സ്ഥാപിത താത്പര്യങ്ങള് സംരക്ഷിക്കുന്നതിന് വേണ്ടി മാത്രമാണ്. ഇത്തരക്കാര് മാധ്യമപ്രവര്ത്തനത്തിന്റെ മൂല്യത്തെ തന്നെ ഇല്ലാതാക്കുകയാണെന്ന് വ്യക്തമാണ്. വിവാദങ്ങള് നിര്മിച്ചെടുക്കുന്ന കാലത്ത് മാധ്യമപ്രവര്ത്തകര് കൂടുതല് ജാഗ്രത പുലര്ത്തണം. സെന്സേഷണല് വാര്ത്തകള് എന്നാല് സെന്സില്ലാത്ത വാര്ത്തകള് എന്നു തന്നെയാണ് ഇന്നത്തെ അര്ഥമെന്നും അദ്ദേഹം ചൂണ്ടിക്കാട്ടി.