ഒരു രൂപയ്ക്കുപോലും തക്കാളി ആർക്കും വേണ്ട. മധ്യപ്രദേശിൽ റോഡരുകിലും ഓടകളിലും തള്ളുന്നത് ക്വിന്റൽ കണക്കിന് തക്കാളി. വില കുറച്ചാൽ പോലും മാർക്കറ്റിൽ ഡിമാൻഡില്ല. ആയിരക്കണക്കിന് കർഷകർ ദുരിതക്കയത്തിൽ

മദ്ധ്യപ്രദേശിൽ ഒരു രൂപയ്ക്കുപോലും തക്കാളി ആർക്കും വേണ്ട.. ജബൽപൂർ, ഇൻഡോർ, ഭോപ്പാൽ, ഗ്വാളിയോർ മുതലായ മേഖലകളിൽ ക്വിന്റൽ കണക്കിന് തക്കാളി റോഡരുകിലും ഓടകളിലും കർഷകർ കൊണ്ടുവന്ന് ഡംപ് ചെയ്യുകയാണ്. വിലയില്ല. അതുതന്നെ യാണ് കാരണം.

ഒരേക്കർ സ്ഥലത്ത് തക്കാളി കൃഷിചെയ്യാൻ ഒരു ലക്ഷം രൂപ ചെലവ് വരും. കഴിഞ്ഞ മൂന്നു മാസത്തെ കർഷകരുടെ പ്രയത്നമാണ് പാഴായിരിക്കുന്നത്. കർഷകർ പലരും കടക്കെണിയിലുമാണ്. 

ഒരേക്കറിൽ നിന്നും 600 ക്വിന്റൽ തക്കാളി വിളവെടുക്കും. നല്ല വില ലഭിച്ചാൽ സാമാന്യരീതിയിൽ ഏക്കറിന് 2 ലക്ഷത്തിനും മുകളിൽ ലാഭമുണ്ടാകും. മാർക്കറ്റ് ഉഷാറായാൽ കർഷകന് ലാഭം ഏക്കറിന് മൂന്നു ലക്ഷത്തിനും മുകളിലാവാം ലഭിക്കുന്നത്.

ഗ്രാമീണ മേഖലകളിലെ കർഷകർ തക്കാളി കന്നുകാലികൾക്ക് തീറ്റയായി നൽകുകയാണ്. മറ്റു പോംവഴി യില്ല.

എന്നാൽ റീട്ടെ യിൽ മാർക്കറ്റിൽ ഇപ്പോഴും കിലോ 8 രൂപമുതൽ 10 രൂപവരെയാണ് വില.വളരെ ഉന്നതശ്രേണിയിലുള്ള തക്കാളിയാണ് മദ്ധ്യപ്രദേശിൽ വിളയിക്കുന്നത്.

കൃഷി വിദഗ്ദ്ധരുടെ അഭിപ്രായത്തിൽ ഇത്തവണ തക്കാളിയുടെ ബമ്പർ വിളവാണ് ഉണ്ടായിരിക്കുന്നത്. അതിനുള്ള കാരണം നല്ല മഴ ലഭിച്ചു, ജനുവരി, ഫെബ്രുവരി മാസത്തിൽ മഞ്ഞുവീഴ്ചയുണ്ടായില്ല, കൂടുതൽ ദിവസം ശീതക്കാറ്റും വീശിയില്ല. ഇതെല്ലം നല്ല വിളവിനുള്ള ഘടകങ്ങളായി മാറി.

അക്കാരണം കൊണ്ട് മണ്ടികളിൽ വ്യാപകമായി തക്കാളിവന്നെത്തി. വാങ്ങാനാളില്ലാത്തതുമൂലം വിപണിയിൽ ഡിമാൻഡ് ഇല്ലാതായി, വിലയിടിഞ്ഞു. കഴിഞ്ഞവർഷം 32.73 മെട്രിക് ടൺ ഉദ്പ്പാദനം നടന്നപ്പോൾ ഇക്കൊല്ലം ഉദ്പ്പാദനം 94.7 മെട്രിക് ടണ്ണായി ഉയർന്നു.