വോട്ടിനായി ഓടുമ്പോഴും ആരോഗ്യം മുഖ്യം ! തെരഞ്ഞെടുപ്പ് കാമ്പയിൻ ചൂടിലും ആരോഗ്യജാഗ്രത നിര്‍ണായകം. സ്ഥാനാർഥികൾ പാലിക്കേണ്ട ദിനചര്യയും ഭക്ഷണക്രമവും ഇങ്ങനെ - ഡോ. ബി പദ്മകുമാര്‍

സ്ഥാനാർഥികൾ രാപകലില്ലാതെ വോട്ടിനായുള്ള ഓട്ടമാണ്. കൈയും മെയ്യും മറന്നുള്ളഓട്ടം. ഈ പാച്ചിലിനിടയിൽ ആരോഗ്യ കാര്യങ്ങൾ മറക്കരുത്. ചുമരുണ്ടെങ്കിലല്ലേ ചിത്രമെഴുതാൻ പറ്റുകയുള്ളു.

ആരോഗ്യത്തോടെ മത്സരിച്ച് ജയം ഉറപ്പാക്കാൻ ഭക്ഷണത്തിലും ദിനചര്യയിലും ഇക്കാര്യങ്ങൾ ശ്രദ്ധിക്കാം. 

1. നേരം പരപരാന്നു വെളുക്കുമ്പോൾ തന്നെ ചിരിയും ഫിറ്റ്‌ ചെയ്ത് ഇറങ്ങേണ്ടതല്ലേ. വയറുനിറച്ച് ബ്രേക്ക്‌ ഫാസ്റ്റ് കഴിക്കാൻ മറക്കരുത്. വൈകുന്നേരം വരെ പിടിച്ചുനിൽക്കാൻ സമൃദ്ധമായ ബ്രേക്ക്‌ഫാസ്റ്റ് ഉപകരിക്കും. ഒപ്പം എന്തെങ്കിലും പഴങ്ങളും കഴിക്കണം. 
2. രാവിലെ പതിവായി കഴിക്കാറുള്ള പ്രഷറിന്റെയും ഷുഗറിന്റെയും ഉൾപ്പടെയുള്ള മരുന്നുകൾ മറക്കരുത്. വൈകുന്നേരത്തേക്ക് മാറ്റിവെക്കുകയും വേണ്ട.
3. സ്ഥാനാർഥിക്കുപ്പായം ഇടുമ്പോൾ തന്നെ ഷുഗറും പ്രഷറും മറ്റ് അടിസ്ഥാന പരിശോധനകളും നടത്തണം. മരുന്നുകളിൽ വരുത്തേണ്ട മാറ്റങ്ങൾ ഡോക്ടറുടെ നിർദേശപ്രകാരം നടത്തണം.
4. ഇടനേരങ്ങളിൽ വറപൊരിയും ചെറുകടികളും വേണ്ട. പഴങ്ങളോ ആവിയിൽ പുഴുങ്ങിയ പലഹാരങ്ങളോ ആകാം.
5. പത്തു ഗ്ലാസ് വെള്ളമെങ്കിലും പലനേരമായി കുടിക്കണം. ശുദ്ധജലം മതി. കോളയും സോഫ്റ്റ്‌ ഡ്രിങ്ക്സും വേണ്ട.
6. ഉച്ച ഭക്ഷണം രണ്ട് മണിക്ക് മുൻപായി കഴിക്കണം. ചോറ് കുറച്ചു മതി. 10 മിനിറ്റൊന്ന് മയങ്ങാൻ പറ്റിയാൽ ഉഷാറായി വണ്ടി ഓടും.
7. അത്താഴം ഹെവി ആകരുത്. ലഘു ഭക്ഷണം മതി.രാത്രിയിലും എന്തെങ്കിലും പഴങ്ങൾ കഴിക്കാം.
8. കിട്ടാനുള്ള വോട്ടും എണ്ണിയിരുന്ന് രാത്രിയിൽ ഉറക്കമിളക്കരുത് .ആറു മണിക്കൂറെങ്കിലും സുഖമായി ഉറങ്ങണം.
9. പനി, ജലദോഷം ഉള്ളവരുമായി അടുത്ത് ഇടപഴകരുത്. ആശുപത്രി സന്ദർശനങ്ങളും ഒഴിവാക്കിയാൽ നന്ന്. 
10. സ്മാർട്ട്‌ ആണെന്ന് കാണിക്കാൻ വേലിയും വരമ്പും കൈത്തോടുമൊന്നും ചാടി കടക്കാൻ നോക്കേണ്ട. കാലൊന്ന് ഉളുക്കിയാൽ തീർന്നില്ലേ കാര്യം. മുറിവുകൾ ഉണ്ടാകാതെയും ശ്രദ്ധിക്കണം. 

-ഡോ. ബി. പദ്മകുമാർ(പ്രിൻസിപ്പൽ. മെഡിക്കൽ കോളേജ് ആലപ്പുഴ)