ഇന്ത്യയുടെ ചന്ദ്രയാന് മുമ്പേ റഷ്യയുടെ ലൂണ ചന്ദ്രനെ തൊടും! കഴിഞ്ഞ 47 വർഷത്തിനിടെ റഷ്യയുടെ ആദ്യ ചാന്ദ്ര ദൗത്യമാണിത്. ലൂണ-25 ഇറങ്ങുക ചന്ദ്രനിലെ സൗത്ത് പോളിൽ, ലക്ഷ്യം ജലസാന്നിധ്യത്തെ കുറിച്ചുള്ള പഠനം. ലൂണയുടെ ലാൻഡർ ഒരു വർഷം വരെ ചന്ദ്രോപരിതലത്തിൽ നിരവധി പരീക്ഷണങ്ങളും പഠനങ്ങളും നടത്തും

ഏകദേശം 50 വർഷത്തിനുശേഷമാണ് റഷ്യ ചന്ദ്രനിലേക്ക് വീണ്ടുമൊരു ദൗത്യം ആരംഭിക്കുന്നത്. ഇത്തവണ പ്രധാനലക്ഷ്യം ചന്ദ്രനിൽ ജലത്തിന്റെ സാന്നിദ്ധ്യം ഉറപ്പാക്കുക എന്നതാണ്.

ഇന്ത്യയുടെ ചന്ദ്രയാൻ 1 മിഷനാണ് ചന്ദ്രനിൽ ജലസാന്നിദ്ധ്യമുണ്ടെന്ന വിവരം ആദ്യമായി പുറംലോകത്തെ അറിയിച്ചത്.1976 ൽ ആണ് ചന്ദ്രനിൽ റഷ്യയുടെ അവസാനത്തെ ലൂണ 24 മിഷൻ ലാൻഡ് ചെയ്തത്.

ലൂണ 25 ആഗസ്റ്റ് 11 നാണ് വിക്ഷേപണം നടത്തിയത്. 5 ദിവസം കൊണ്ട് ഇത് ചന്ദ്രോപരിതലത്തിൽ എത്തപ്പെടും. തുടർന്ന് 5 മുതൽ 7 ദിവസം വരെ ചന്ദ്രന്റെ ഭ്രമണപഥത്തിലെ യാത്രയിൽ പലതരത്തിലുള്ള പഠനങ്ങൾ നടത്തിയശേഷം ജലസാന്നിദ്ധ്യമുണ്ടെന്ന് കരുതപ്പെടുന്ന ചന്ദ്രനിലെ സൗത്ത് പോളിലാകും ലൂണ 25 ലാൻഡ് ചെയ്യുക.

ലൂണയുടെ ലാൻഡർ ഏകദേശം ഒരു വർഷം വരെ ചന്ദ്രോപരിതലത്തിൽ നിരവധി പരീക്ഷണങ്ങളും പഠനങ്ങളും നടത്തപ്പെടും.

ഇന്ത്യയുടെ ചന്ദ്രയാൻ 3 ഇക്കഴിഞ്ഞ ജൂലൈ 14 നായിരുന്നു വിക്ഷേപിച്ചത്. ഈ മാസം അതായത് ആഗസ്റ്റ് 23 നാണ് ചന്ദ്രനിൽ അതിൻ്റെ സോഫ്റ്റ് ലാൻഡിംഗ് നിശ്ചയിച്ചിട്ടുള്ളത്. അതിനുമുമ്പുതന്നെ ലൂണ 25 ചന്ദ്രനിൽ ലാൻഡുചെയ്യുമെന്നാണ് അനുമാനം.