സിദ്ധരാമയ്യ കർണാടക മുഖ്യമന്ത്രി; ഡികെ ശിവകുമാർ ഉപമുഖ്യമന്ത്രിയാകും, സത്യപ്രതിജ്ഞ ശനിയാഴ്ച

ന്യൂഡൽഹി: മാരത്തൺ ചർച്ചകൾക്കും അഭ്യൂഹങ്ങൾക്കും വിരാമമിട്ട് കർണാടയിലെ മുഖ്യമന്ത്രിയെ തീരുമാനിച്ച് കോൺഗ്രസ് ഹൈക്കമാൻഡ്.

മുൻ മുഖ്യമന്ത്രിയും മുതിർന്ന നേതാവുമായ സിദ്ധരാമയ്യ തന്നെ കർണാടക മുഖ്യമന്ത്രിയാകും. ഡി കെ ശിവകുമാർ ഉപമുഖ്യമന്ത്രിയാകും. കോൺഗ്രസ് അധ്യക്ഷൻ മല്ലികാർജുൻ ഖാർഗയുടെ നേതൃത്വത്തിൽ നടന്ന ചർച്ചകൾക്കൊടുവിലാണ് നേതൃത്വം സമവായത്തിലെത്തിത്.

മെയ് 20 ശനിയാഴ്ച സത്യപ്രതിജ്ഞ നടത്താനും തീരുമാനമായി. നാല് ദിവസങ്ങൾ നീണ്ട് നിന്ന ചർച്ചകൾക്കൊടുവിലാണ് കർണാടക മുഖ്യമന്ത്രി ആരാകണമെന്ന കാര്യത്തിൽ കോൺഗ്രസ് നേതൃത്വം സമവായത്തിലെത്തിയത്.

ഇന്ന് വൈകിട്ട് ഏഴിന് ബംഗളൂരുവിൽ കോൺഗ്രസ് നിയമസഭകക്ഷി യോഗം ചേരും. ഈ യോഗത്തിൽ കക്ഷി നേതാവായി സിദ്ധരാമയ്യയെ തീരുമാനിക്കും. വകുപ്പ് വിഭജനം സംബന്ധിച്ച തീരുമാനം ഇരുവിഭാഗവും സമവായത്തിലൂടെ നടപ്പിലാക്കുമെന്നാണ് റിപ്പോർട്ടുകൾ.