സുരേന്ദ്രനും ജാനുവിനുമെതിരെ കേസ് എടുക്കാം; സുന്ദരയ്ക്ക് എതിരെ കേസില്ല ! പിണറായിക്കെതിരെ പോസ്റ്റിട്ടാൽ അകത്തിടും; മോദിക്കെതിരിയെങ്കിൽ കുഴപ്പമില്ല. പിണറായിയുടെ പോലീസിന് പല നിയമമോ?

സത്യം ഡെസ്ക്
Friday, June 18, 2021

-തിരുമേനി

പിണറായിയുടെ പോലീസിന് പല നിയമമോ ? സി.കെ ജാനുവിന് പണം നൽകിയ കെ സുരേന്ദ്രന്റെ പേരിൽ കേസ്. പണം വാങ്ങിയ സി.കെ ജാനുവിനെതിരെ കേസ്. ശരിയാണ് കൈക്കൂലി കൊടുക്കുന്നതും വാങ്ങുന്നതും കുറ്റകരം ആണ്. പത്രിക പിൻവലിക്കാൻ കെ. സുന്ദരക്ക് പണം നൽകിയ കെ.സുരേന്ദ്രന് എതിരെ കേസ്. പണം വാങ്ങി പത്രിക പിൻവലിച്ച കെ.സുന്ദരക്ക് എതിരെ കേസില്ല. ഇതെന്ത് നിയമമാണ് ?

ടി.പി.ചന്ദ്രശേഖരൻ വധക്കേസിലെ പ്രതിയായിരുന്ന കെ കുഞ്ഞനന്തന്റെ ശവസംസ്ക്കാര ചടങ്ങിൽ പങ്കെടുത്തത് പിണറായി വിജയൻ ഉൾപ്പടെ ആയിരത്തോളം പേർ. ഇതിനെതിരെ കേസില്ല.

എന്നാൽ പുതിയ കെ.പി.സി.സി. പ്രസിഡന്റായി കെ.സുധാകരൻ ചുമതലയേറ്റ പ്പോൾ ഇന്ദിരാഭവനിൽ സന്നിഹിതരായിരുന്ന നൂറോളം പേർക്കെതിരെ കേസ്. ഇതെന്ത് നിയമമാണ് ?

പിണറായി വിജയനെതിരെ പോസ്റ്റിട്ടാൽ സസ്പെൻഡ് ചെയ്യും അല്ലെങ്കിൽ അകത്താക്കും.
പ്രധാനമന്ത്രി മോദിക്കെതിരെ രാജ്യദ്രോഹ പരാമർശം നടത്തിയാൽ പിണറായി മന്ത്രിസഭയിലെ മന്ത്രിമാർ പരാമർശം നടത്തുന്നവരെ അനുകൂലിക്കും. സി.പി.ഐ യെപ്പോലെയുള്ള ഇടത് പാർട്ടികൾ നിയമ സഹായവും നൽകും. ഇത് എന്തൊരു ഏർപ്പാടാണ് ?

നിയമം അധികാരം കൈയ്യാളുന്നവർക്കനുസൃതമായി മാറുമോ ? എത്ര കോടി രൂപയുടെ തേക്കും ഈട്ടിയുമാണ് വെട്ടി കടത്തിയത് ? യു.ഡി.എഫിന്റെ ഭരണകാലമാണെങ്കിൽ എത്ര ബസ് കത്തുമായിരുന്നു ? എത്ര പോലീസ് വാഹനങ്ങൾ കത്തിക്കുമായിരുന്നു ? എത്ര മന്ത്രിമാരെ വഴി തടയുമായിരുന്നു ? എത്ര കോടിയുടെ പൊതുമുതൽ നശിക്കുമായിരുന്നു ?

ഇനി പേരിന് നാലോ അഞ്ചോ ഉദ്യോഗസ്ഥരെ ബലിയാടാക്കി കേസ് എടുക്കും. മൂന്ന് മാസം സസ്‌പെൻഷനിൽ നിർത്തും. മറ്റെന്തെങ്കിലും വൻ സംഭവം ഉണ്ടാകുമ്പോൾ അതിന്റെ മറവിൽ തിരിച്ചെടുക്കും.

കഴിഞ്ഞ മന്ത്രിസഭയിൽ റവന്യൂ, വനം വകുപ്പുകൾ സി.പി.ഐയുടെ കൈയ്യിൽ ആയിരുന്നു. റവന്യു പ്രിൻസിപ്പൽ സെക്രട്ടറി ഇറക്കിയ ഉത്തരവിൽ പിഴവില്ല എന്ന് കാനം രാജേന്ദ്രൻ പറയുന്നു. പിഴവുണ്ട് എന്ന് സെക്രട്ടറി പറയുന്നു. ഇതിൽ നിന്ന് ഒരു കാര്യം വ്യക്തമല്ലേ ?

രാഷ്ട്രീയ നേതൃത്വം അറിയാതെ ഇങ്ങിനെ ഒരു ഉത്തരവ് ഇറങ്ങുമോ ? വനം വകുപ്പ് മാറ്റി എ.കെ.ശശീന്ദ്രന് നൽകിയത് എന്തിനായിരുന്നു ? മുഖ്യമന്ത്രി, റവന്യൂ മന്ത്രി, വനം മന്ത്രി ഇവർ മൂന്ന് പേരും അറിഞ്ഞു കൊണ്ടു തന്നെ ഈ ഉത്തരവ് ഇറങ്ങിയത്.

കാനം പറയുന്നത് സർവകക്ഷി യോഗത്തിലാണ് തീരുമാനം എടുത്തത് എന്ന്. സർവകക്ഷി യോഗത്തിലായാലും തെറ്റായ തീരുമാനം എടുത്താൽ അധികാരത്തിൽ ഇരിക്കുന്നവർക്കല്ലേ അത് മാറ്റാനുള്ള ബാധ്യത ?

വലിയ അഴിമതിക്കാരല്ലാതിരുന്ന സി.പി.ഐ ക്കാരും ഇപ്പോൾ അഴിമതി വീരൻമാർ ആയിരിക്കുന്നു. ഒരു ഇല താഴെ വീണാൽ കരയുന്ന ബിനോയ് വിശ്വം എവിടെ ? സ്വന്തം പാർട്ടിയിലെ മന്ത്രിമാർ കാടും നാടും വെട്ടി വെളുപ്പിച്ചിട്ട് ബിനോയ് വിശ്വത്തിന് ഒന്നും പറയാനില്ലേ ? പരിസ്ഥിതിക്കും പച്ചപ്പിനും വേണ്ടി താങ്കൾ ഇതുവരെ ഒഴുക്കിക്കൊണ്ടിരുന്നത് മുതലക്കണ്ണീരായിരുന്നോ ?

×