റൂഫ് സോളാർ ചാർജിംഗ് സംവിധാനമുള്ള കാർ പുറത്തിറക്കി ഹ്യുണ്ടായ്

കൊറിയ: റൂഫ് സോളാർ ചാർജിംഗ് സംവിധാനമുള്ള  ആദ്യത്തെ കാർ ഹ്യുണ്ടായ് മോട്ടോർ കമ്പനി പുറത്തിറക്കി. സൊണാറ്റ ഹൈബ്രിഡിൻ്റെ ഏറ്റവും പുതിയ പതിപ്പിൽ ഈ സാങ്കേതികവിദ്യ ഉപയോഗിക്കുമെന്നും വരും വർഷങ്ങളിൽ മറ്റ് വാഹനങ്ങളിൽ അവതരിപ്പിക്കുമെന്നും കമ്പനി അധികൃതർ അറിയിച്ചു.

കാറിൻ്റെ വൈദ്യുതോർജ്ജ സ്രോതസ്സുകളെ പിന്തുണയ്ക്കുന്നതിനും ഇന്ധനക്ഷമത വർധിപ്പിക്കുന്നതിനും കാർബൺ ഡൈ ഓക്സൈഡ് പുറന്തള്ളൽ കുറയ്ക്കുന്നതിനും സോളാർ മേൽക്കൂരയാണ് ആശയമെന്ന് ഹ്യുണ്ടായ് പറഞ്ഞു. വാഹനത്തിൻ്റെ മേൽക്കൂരയിൽ സിലിക്കൺ സോളാർ പാനലുകൾ ഘടിപ്പിച്ചു. കാർ നീങ്ങുമ്പോൾ ചാർജ് ചെയ്യാൻ കഴിയും.

കാറിൻ്റെ ബാറ്ററിയുടെ 30% മുതൽ 60% വരെ സോളാർ സാങ്കേതികവിദ്യ ഉപയോഗിച്ച് ചാർജ് ചെയ്യാൻ കഴിയുമെന്ന് ഹ്യുണ്ടായ് കൂട്ടിച്ചേർത്തു. പ്രതിദിനം ആറ് മണിക്കൂർ ചാർജ് ചെയ്താൽ, വാഹനത്തിന് പ്രതിവർഷം 1,300 കിലോമീറ്റർ യാത്രാ ദൂരം വർദ്ധിപ്പിക്കാൻ കഴിയും.