ഇന്ത്യയിലെ 100 നഗരങ്ങളിലേക്ക് സ്വിഗ്ഗി ഇന്‍സ്റ്റാമാര്‍ട്ടിന്റെ പ്രവര്‍ത്തനം വ്യാപിപ്പിച്ചു

പാലക്കാട്: ഇന്ത്യയിലെ മുന്‍നിര ക്വിക്ക് കോമേഴ്‌സ് പ്ലാറ്റ്‌ഫോമായ സ്വിഗ്ഗി ഇന്‍സ്റ്റാമാര്‍ട്ട് രാജ്യവ്യാപകമായി 100 നഗരങ്ങളിലേക്ക് പ്രവര്‍ത്തനം വ്യാപിപ്പിച്ചു. കേരളത്തില്‍ പാലക്കാട്, ആലപ്പുഴ എന്നീ നഗരങ്ങളിലാണ് സ്വിഗ്ഗി ഇന്‍സ്റ്റാമാര്‍ട്ട് ആരംഭിച്ചത്. 10 മിനിറ്റ് ഡെലിവറികള്‍ക്കായുള്ള വര്‍ദ്ധിച്ചുവരുന്ന ആവശ്യം കണക്കിലെടുത്താണിത്. ഇതോടെ, പലചരക്ക് സാധനങ്ങളും ദൈനംദിന അവശ്യവസ്തുക്കള്‍ മുതല്‍ ഇലക്ട്രോണിക്സ്, സ്മാര്‍ട്ട്‌ഫോണുകള്‍, ഫാഷന്‍, മേക്കപ്പ്, കളിപ്പാട്ടങ്ങള്‍ തുടങ്ങി 30,000-ത്തിലധികം ഉല്‍പ്പന്നങ്ങള്‍ ഇന്‍സ്റ്റാമാര്‍ട്ടിലൂടെ ലഭിക്കും.

പലചരക്ക് സാധനങ്ങൾ, അവശ്യവസ്തുക്കൾ മുതൽ ഉത്സവകാല, ദൈനംദിന ആവശ്യങ്ങൾക്കു വരെ ദശലക്ഷക്കണക്കിന് ഇന്ത്യക്കാർ ഉപയോഗിക്കുന്ന സ്വിഗ്ഗി ഇൻസ്റ്റാമാർട്ട് 100 നഗരങ്ങളിലേക്ക് കൂടി വികസിക്കുമ്പോൾ ഉപഭോക്തൃ ആവശ്യങ്ങൾ മികച്ച രീതിയിൽ നിറവേറ്റാൻ ഞങ്ങളെ പ്രാപ്തമാക്കുന്നുവെന്ന് സ്വിഗ്ഗി ഇൻസ്റ്റാമാർട്ടിന്റെ സിഇഒ അമിതേഷ് ഝാ പറഞ്ഞു. ഉൽപ്പന്നങ്ങൾ എളുപ്പത്തിൽ ലഭ്യമാക്കി സ്റ്റോർ ജീവനക്കാരെയും ഡെലിവറി പങ്കാളികളെയും ശാക്തീകരിച്ചുകൊണ്ട് പ്രാദേശിക ആവാസവ്യവസ്ഥയെ പിന്തുണയ്ക്കുന്നതിലും അഭിമാനമുണ്ടെന്നും അദ്ദേഹം കൂട്ടിച്ചേർത്തു.

കൂടാതെ ക്രിക്കറ്റ്, ഉത്സവ സീസണുകൾക്കൊപ്പം സ്വിഗ്ഗി ഇൻസ്റ്റാമാർട്ട് 'മെഗാപോഡുകൾ' അവതരിപ്പിച്ചുകൊണ്ട് ഡാർക്ക്‌സ്റ്റോർ ശൃംഖല വികസിപ്പിക്കുകയാണ്. 10,000 മുതൽ 12,000 ചതുരശ്ര അടി വരെ വിസ്തീർണ്ണമുള്ള ഈ മെഗാപോഡുകളിൽ 50,000 സ്റ്റോക്ക് കീപ്പിംഗ് യൂണിറ്റുകൾ വരെ സ്ഥാപിക്കാൻ കഴിയും. ഇത് ഉപഭോക്താക്കൾക്ക് ഒരു സാധാരണ ഡാർക്ക്‌സ്റ്റോറിൽ നിന്നുള്ളതിനേക്കാൾ മൂന്നിരട്ടി ഉൽപ്പന്നങ്ങൾ   ലഭ്യമാക്കുന്നു. ഇതിൽ എഫ്എംസിജി, ഡി2സി ബ്രാൻഡുകളുടെ മിശ്രിതവും ഓരോ നഗരത്തിലെയും ഉപഭോക്താക്കളുടെ തനതായ മുൻഗണനകൾക്ക് അനുസൃതമായി തയ്യാറാക്കിയ പ്രാദേശിക ബ്രാൻഡുകളും ഉൾപ്പെടുന്നു.