'ചന്ദ്ര ​ഗര്‍ഭിണിയാണ്, അച്ഛനും അമ്മയുമാകാന്‍ പോകുന്നു'; സന്തോഷം പങ്കിട്ട് ടോഷ് ക്രിസ്റ്റിയും ചന്ദ്ര ലക്ഷ്മണും

പരസ്പരം കണ്ട് ഇഷ്ടപ്പെട്ടശേഷം വീട്ടുകാരുടെ സമ്മതത്തോടെ ഇക്കഴിഞ്ഞ നവംബറില്‍ ഇരുവരും വിവാഹിതരായത്. വിവാഹം കഴിഞ്ഞ് ആറ് മാസം പിന്നിടുമ്ബോള്‍ ഇരുവരും പുതിയ വിശേഷം പങ്കുവെച്ച്‌ എത്തിയിരിക്കുകയാണ്. തങ്ങള്‍ക്ക് ആദ്യത്തെ കുഞ്ഞ് പിറക്കാന്‍ പോകുന്നുവെന്നും ചന്ദ്ര ​ഗര്‍‌ഭിണിയാണെന്നുമാണ് ടോഷും ചന്ദ്രയും ടോഷിന്റെ യുട്യൂബ് ചാനല്‍ വഴി അറിയിച്ചത്.എല്ലാ കാര്യങ്ങളും തങ്ങളുടെ നന്മ ആ​ഗ്രഹിക്കുന്ന പ്രേക്ഷകരോട് ആദ്യം പറയണമെന്ന് ഉണ്ടായിരുന്നുവെന്നും അതുകൊണ്ടാണ് ഇത്തരമൊരു വീഡിയോ ചെയ്യുന്നതെന്നും ടോഷും ചന്ദ്രയും പറ‌യുന്നു. കൊച്ചിയിലെ ഒരു സ്വകാര്യ റിസോര്‍ട്ടില്‍ വെച്ചായിരുന്നു ഇരുവരുടേയും വിവാഹം നടന്നത്.

അതേ സ്വകാര്യ റിസോര്‍ട്ടില്‍ വെച്ച്‌ തന്നെയാണ് ഇരുവരും പുതിയ അതിഥി വരാന്‍ പോകുന്ന സന്തോഷം അറിയിച്ചുള്ള വീഡിയോ ഷൂട്ട് ചെയ്തിരിക്കുന്നതും. ആറ് മാസം മുമ്ബ് നടന്ന വിവാഹത്തിന്റെ ഓര്‍മകളും ഇരുവരും വീണ്ടും പുതുക്കി. യഥാര്‍ഥ ജീവിതത്തില്‍ ​ഗര്‍ഭിണിയായപോലെ തന്നെ ഇരുവരും അഭിനയിക്കുന്ന സ്വന്തം സുജാതയിലെ ചന്ദ്ര അവതരിപ്പിക്കുന്ന കഥാപാത്രവും ​ഗര്‍ഭിണിയാകുന്നതാണ് കഥയുടെ പുതിയ ട്വിസ്റ്റെന്നും ‌ചന്ദ്രയും ടോഷും വെളിപ്പെടുത്തി. റിയല്‍ ലൈഫിലും റീല്‍ ലൈഫിലും ഓരേപോലെ സന്ദര്‍ഭങ്ങള്‍ വരുന്നതില്‍ സന്തോഷമുണ്ടെന്നും ഇരുവരും പറഞ്ഞു. നിരവധി പേരാണ് പുതിയ വിശേഷം പങ്കുവെച്ചുള്ള താരദമ്ബതികളുടെ വീഡിയോയ്ക്ക് ആശംസകള്‍ അറിയിക്കുന്നത്.

വര്‍ഷങ്ങളായി ഇന്‍ഡസ്ട്രിയിലുണ്ടെങ്കിലും സ്വന്തം സുജാത സെറ്റില്‍ വെച്ചാണ് ടോഷും ചന്ദ്രയും ആദ്യമായി കാണുന്നത്. പരമ്ബരയുടെ നൂറാം എപ്പിസോഡിന് ശേഷമാണ് ടോഷ് ക്രിസ്റ്റിയുടെ ആദം എന്ന കഥാപാത്രം പരമ്ബരയിലേക്ക് എത്തിയത്. പിന്നീടാണ് കാര്യങ്ങള്‍ മാറി മറി‌ഞ്ഞതും ഇരുവരും വിവാഹിതരായതും. വളരെ ചുരുങ്ങിയ നാളുകള്‍ക്കുള്ളില്‍ തന്നെ സ്വന്തം സുജാതയിലെ ടോഷിന്റേയും ചന്ദ്രയുടേയും കഥാപാത്രങ്ങള്‍ക്ക് ജനപ്രീതി ലഭിച്ചു.

വിവാഹശേഷമുള്ള ജീവിതത്തെ കുറിച്ച്‌ ഒരിക്കല്‍ ചന്ദ്ര ലക്ഷ്മ പറഞ്ഞത് ഇങ്ങനെയായിരുന്നു. 'വിവാഹ ശേഷം ഒന്നും മാറിയതായി തോന്നുന്നില്ല. ഇടയ്ക്കിടെ ഞാന്‍ എന്നെത്തന്നെ ഓര്‍മിപ്പിക്കും വിവാഹം കഴിഞ്ഞിട്ട് മാസങ്ങളായിയെന്ന് പക്ഷെ ഇപ്പോള്‍ ജീവിതം കൂടുതല്‍ രസകരമായി മാറി.' 'ഒരൊറ്റ കുട്ടിയായിരുന്ന എനിക്ക് ജീവിതത്തില്‍ ഒന്നും പങ്കുവെക്കാന്‍ കഴിഞ്ഞിട്ടില്ല. ഇപ്പോള്‍ എനിക്ക് എല്ലാം പങ്കിടാന്‍ ഒരാളുണ്ടെന്ന് തോന്നുന്നു.'

'അതൊരു പുതുമയാണ്. മറുവശത്ത് എന്റെ ജീവിതത്തിലെ എല്ലാ ശൂന്യതകളും അദ്ദേഹം നികത്തി. ഒരു നല്ല സുഹൃത്ത്, കരുതലുള്ള പങ്കാളി, തൊഴില്‍ ഉപദേഷ്ടാവ്' ചന്ദ്ര പറഞ്ഞു.

2002ല്‍ പുറത്തിറങ്ങിയ മനസെല്ലാം എന്ന തമിഴ് ചിത്രത്തിലൂടെയാണ് ചന്ദ്ര സിനിമയിലെത്തുന്നത്. സ്റ്റോപ്പ് വയലന്‍സ് എന്ന പൃഥ്വിരാജ് ചിത്രത്തിലൂടെ മലയാള സിനിമയിലേക്കും എത്തി. ചക്രം, കല്യാണ കുറിമാനം, ബോയ്ഫ്രണ്ട്, പച്ചക്കുതിര, പായും പുലി, കാക്കി തുടങ്ങിയ ചിത്രങ്ങളിലും ശ്രദ്ധേയ വേഷങ്ങള്‍ ചെയ്തു. നിരവധി ഹിറ്റ് പരമ്ബരകളിലും ശ്രദ്ധേയ വേഷങ്ങള്‍ ചന്ദ്ര അവതരിപ്പിച്ചിരുന്നു. കായംകുളം കൊച്ചുണ്ണി എന്ന സീരിയലിലൂടെയാണ് ടോഷ് ക്രിസ്റ്റി ശ്രദ്ധ നേടിയത്. തൃശ്ശൂര്‍ സ്വദേശിയാണ്.