ലൈംഗികമായി പീഡിപ്പിച്ചു, മണിക്കൂറുകൾക്കുള്ളിൽ ജോലിയിൽ നിന്നും പിരിച്ചു വിട്ടു: നടനെതിരെ പരാതി

ഹോളിവുഡ് താരം വിൻ ഡീസലിനെതിരെ ലൈംഗികാതിക്രമത്തിന് കേസ്. നടന്റെ മുൻ സഹായിയാണ് ആരോപണവുമായി രംഗത്തെത്തിയിരിക്കുന്നത്. 2010ൽ ഫാസ്റ്റ് ഫൈവിന്റെ ചിത്രീകരണ സമയത്ത് ലൈംഗികമായി തന്നെ പീഡിപ്പിച്ചുവെന്നും ആക്രമണത്തിന് മണിക്കൂറുകൾക്ക് ശേഷം തന്നെ ജോലിയിൽ നിന്നും പുറത്താക്കിയതായും പരാതിക്കാരി പറയുന്നു. അറ്റ്‌ലാൻഡയിലെ സെന്റ് റെജീസ് ഹോട്ടലിൽ വെച്ചായിരുന്നു അതിക്രമം എന്നും പരാതിയിൽ പറയുന്നുണ്ട്. 

വ്യാഴാഴ്ചയാണ് യുവതി പരാതി നൽകുന്നത്. ഫാസ്റ്റ് ആൻഡ് ഫ്യൂരിസ് സിനിമ നിർമ്മിച്ച കമ്പനിയാണ് യുവതിയെ 2010ൽ ജോലിയ്ക്ക് നിയമിക്കുന്നത്. വസ്ത്രങ്ങൾ വലിച്ചൂരിയെന്നും ശുചിമുറിയിലേക്ക് ഓടി രക്ഷപെടാൻ ശ്രമിച്ച തന്നെ പിന്തുടർന്നെത്തി പീഡിപ്പിച്ചുവെന്നും പരാതിയിൽ പറയുന്നു. നടന്റെ സഹോദരിയ്‌ക്കെതിരേയും യുവതി ആരോപണങ്ങൾ ഉന്നയിക്കുന്നുണ്ട്. 

സംഭവം നടന്ന് 12 വർഷങ്ങൾക്ക് ശേഷം പരാതിയുമായി വന്നതിൽ ദുരൂഹതയുണ്ടെന്ന് നടന്റെ അഭിഭാഷകൻ വാദിച്ചു. എന്നാൽ പേടി മൂലമാണ് ഇത്രയും നാൾ താൻ ഒന്നും പുറത്തു പറയാതിരുന്നതെന്നും മീടൂ നൽകിയ ഊർജ്ജമാണ് ഇപ്പോൾ ഇവയൊക്കെ വിശദമാക്കാൻ കാരണമെന്നും യുവതി വ്യക്തമാക്കി. ഫാസ്റ്റ് ആൻഡ് ഫ്യൂരിയസ് പരമ്പരയുടെ നിർമ്മാതാവ് കൂടിയായ വിൻ ഡീസൽ ഹോളിവുഡിൽ ഏറ്റവും കൂടുതൽ വരുമാനം നേടുന്ന നടന്മാരിൽ ഒരാളാണ്.