സമാന്തരങ്ങളുടെ അവാർഡ് വെട്ടിയത് മലയാളി ജൂറിയംഗമെന്ന് ബാലചന്ദ്രമേനോൻ. അട്ടിമറിച്ചത് അവസാനഘട്ടത്തിലെന്നും മേനോൻ. 13 അംഗ ജൂറിയിലെ ഏക മലയാളി സംവിധായകൻ ഇടത് ചായ്‌വുള്ള കെ.ആർ മോഹനൻ. വെളിപ്പെടുത്തൽ മോനോന്റെ സിനിമാ ജീവിതത്തിന്റെ അമ്പതാം വാർഷികാഘോഷ വേളയിൽ.

തിരുവനന്തപുരം: സമാന്തരങ്ങൾ എന്ന സിനിമയ്ക്ക് ലഭിക്കേണ്ട് മൂന്ന് ദേശീയ അവർഡുകൾ വെട്ടിയത് അന്നത്തെ മലയാളി ജൂറിയംഗത്തിന്റെ ഇടപെടലിലെന്ന് ബാലചന്ദ്രമേനോൻ. സിനിമാ ജീവിതത്തിന്റെ അമ്പതാം വാർഷികാഘോഷ വേളയിലാണ് മേനോന്റെ വെളിപ്പെടുത്തൽ.

ജൂറിയിലെ മറ്റൊരു അംഗമായിരുന്ന ദേവേന്ദ്ര ഖണ്ഡേൽവാൾ ഇക്കാര്യം തന്നോട് പറഞ്ഞതിന്റെ വീഡിയോ പ്രദർശിപ്പിച്ചു കൊണ്ടാണ് മേനോൻ പുതിയ വിവാദത്തിന് തിരികൊളുത്തിയിട്ടുള്ളത്. 13 അംഗ ജൂറിയിൽ അന്നത്തെ ഏക മലയാളി സംവിധായകൻ കെ ആർ മോഹനൻ മാത്രമായിരുന്നു. എന്നാൽ അദ്ദേഹത്തിന്റെ പേര് പരാമർശിക്കാതെയാണ് മോനോൻ കാര്യങ്ങൾ തുറന്നടിച്ചത്.

1997ൽ ബാലചന്ദ്രമേനോൻ സംവിധാനം ചെയ്ത്, ഭാര്യ നിർമ്മിച്ച 'സമാന്തരങ്ങൾ'ക്ക് മികച്ച സിനിമയ്ക്കും, മികച്ച സംവിധായകനും, നടനുമുള്ള അവാർഡുകൾ നൽകാനാണ് ജൂറി തീരുമാനിച്ചതെന്ന വിവരമാണ് ഇപ്പോൾ പുറത്ത് വരുന്നത്. അവാർഡ് നിർണ്ണയത്തിന്റെ അവസാനഘട്ടത്തിലാണ് അട്ടിമറിയുണ്ടായത്.

ബി സരോജാ ദേവി അധ്യക്ഷയായ ജൂറിയിലെ ഏക മലയാളിയായിരുന്നു കെ.ആർ മോഹനൻ. അതുകൊണ്ട് പേര് പറഞ്ഞില്ലെങ്കിലും മേനോൻ ലക്ഷ്യമിട്ടത് മോഹനനെ തന്നെയെന്ന് വ്യക്തം. മാധവൻ, മഹ്ദീപ് സിംഗ്, സിവിഎൽ ശാസ്ത്രി, അരുണ പുരോഹിത്, ഉഷ ഡി കുഞ്ഞ, ദേവേന്ദ്ര ഖണ്ഡേവാൾ, സന്ദീപ് റേ, സ്വാന്തന ബർദോലി, അരുന്ധതി നാഗ്, പുഷ്പ ഭാരതി, കെ ആർ മോഹനൻ, വി മധുസൂദന റാവു എന്നിവരായിരുന്നു മറ്റ് അംഗങ്ങൾ.

ആദ്യഘട്ടത്തിൽ മികച്ച നടനായി തന്നെ മാത്രമായിരുന്നു തിരഞ്ഞെടുത്തതെന്നും പിന്നീട് 'കളിയാട്ട'ത്തിലെ അഭിനയത്തിന് സുരേഷ് ഗോപിക്ക് കൂടി അവാർഡ് നൽകാൻ അവസാനഘട്ടത്തിൽ ജൂറി തീരുമാനിക്കുകയായിരുന്നുവെന്നും ബാലചന്ദ്രമേനോൻ പറയുന്നു.  ഇതോടെ മികച്ച ദേശീയ നടനുള്ള അവാർഡ് സുരേഷ് ഗോപിയുമായി താൻ പങ്കിട്ടു.

ഈ പുരസ്‌കാരം സ്വീകരിക്കാൻ ഡൽഹിയിലെത്തിയ തന്നെ വന്നു പരിചയപ്പെട്ട ദേവേന്ദ്ര ഖണ്ഡേൽവാൾ, കുറ്റബോധത്തോടെ ഒരു ഭാരം ഇറക്കിവയ്ക്കാനുണ്ടെന്ന് പറഞ്ഞു കൊണ്ടാണ് ഇക്കാര്യങ്ങൾ വെളിപ്പെടുത്തിയത്. പിന്നീടാണ് അദ്ദേഹം ഇക്കാര്യം ക്യാമറക്ക് മുന്നിൽ പറയാൻ തയ്യാറായത്. എന്നാൽ താനിക്കാര്യം ഇതുവരെയും രഹസ്യമായി സൂക്ഷിക്കുകയായിരുന്നു എന്നും അദ്ദേഹം വ്യക്തമാക്കി.