'കല്യാണം കഴിക്കാൻ പോവുകയാണ്...'; ഭാവി വധുവിനെ പൊതുവേദിയിൽ വെച്ച് എടുത്തുപൊക്കി കാളിദാസ് ജയറാം

ഇക്കഴിഞ്ഞ തിരുവോണ ദിനത്തിൽ കാളിദാസ് ജയറാം  പങ്കുവെച്ച കുടുംബ ചിത്രം വൈറലായിരുന്നു. എന്നാൽ, നാലംഗ കുടുംബത്തിന്റെ ചിത്രത്തിൽ അഞ്ചാമത് ഒരാൾ കൂടി ഉണ്ടായിരുന്നു. കാളിദാസിനൊപ്പം ഇരിക്കുന്ന പെൺകുട്ടിയായിരുന്നു പുതിയ അതിഥി. ഇതോടെ ആരാണ് ഈ പെൺകുട്ടിയെന്നായി ആരാധകരുടെ സംശയം. നീണ്ട ചർച്ചകൾക്കും തിരച്ചിലുകൾക്കും ശേഷം പെൺകുട്ടിയെ സോഷ്യൽ മീഡിയ ഉപയോക്താക്കൾ കണ്ടെത്തി. 

മോഡലും 2021ലെ ലിവാ മിസ് ദിവാ റണ്ണറപ്പുമായിരുന്ന തരിണി കലിംഗരായർ ആയിരുന്നു കാളിദാസിന്റെ കുടുംബത്തിലെ പുതിയ അതിഥി. തരിണിയും കാളിദാസും തമ്മിൽ പ്രണയത്തിലാണെന്ന് ആരാധകർ ഉറപ്പിച്ചതിന് പിന്നാലെ ഇക്കാര്യം ശരിവെച്ച് കാളിദാസും രംഗത്തെത്തിയിരുന്നു. ഇപ്പോൾ ഇതാ തരിണിയെ കല്യാണം കഴിക്കാൻ പോവുകയാണെന്ന് പൊതുവേദിയിൽ വെച്ച് പറഞ്ഞിരിക്കുകയാണ് കാളിദാസ്. 

ഷി തമിഴ് നക്ഷത്ര അവാർഡ് 2023ൽ ബെസ്റ്റ് ഫാഷൻ മോഡലിനുള്ള പുരസ്‌കാരം തരിണിയ്ക്ക് ആയിരുന്നു. തരിണിയ്ക്ക് പിന്തുണ നൽകി ചടങ്ങിൽ കാളിദാസ് ജയറാമും എത്തിയിരുന്നു. തരിണിയ്ക്ക് പിന്നിൽ അഭിമാനത്തോടെ ഒരാളുണ്ടെന്നും അദ്ദേഹത്തെ മെൻഷൻ ചെയ്യാതാരിക്കാൻ പറ്റില്ല എന്നും ചൂണ്ടിക്കാട്ടി അവതാരക കാളിദാസ് ജയറാമിനെ വേദിയിലേക്ക് ക്ഷണിക്കുകയായിരുന്നു.

വേദിയിലെത്തിയ കാളിദാസ് തരിണിയെ കെട്ടിപ്പെടിച്ചു. എന്താണ് നിങ്ങളുടെ ബന്ധമെന്നും തുടർന്ന് അവതാരക ചോദിച്ചു. വിവാഹം കഴിക്കാൻ പോകുകയായിരുന്നുവെന്നായിരുന്നു കാളിദാസ് നൽകിയ മറുപടി. സൂര്യയുടെ ശബ്ദത്തിൽ പ്രപ്പോസ് ചെയ്യുന്ന താരത്തെയും പിന്നീട് തരിണിയെ എടുത്തുയർത്തുന്നതുമൊക്കെ ഷി അവാർഡിന്റെ വീഡിയോയിൽ കാണാം