'സോഷ്യൽ മീഡിയയിൽ എങ്ങനെ തന്നെത്തന്നെ പ്രസന്റ് ചെയ്യാമെന്ന് വളരെ നന്നായി അറിയാവുന്ന ആളാണ് ഷൈൻ'; ഞാൻ അതിനെ എന്റർടെയ്ൻ ചെയ്യില്ല: ​ഗ്രേസ് ആൻ്റണി പറയുന്നു

മലയാളം സിനിമ ലോകത്തിൽ സോഷ്യൽ മീഡിയയിലെ സ്ഥിരം ചർച്ചാ വിഷയമാണ് ഷൈൻ ടോം ചാക്കോ. അഭിമുഖങ്ങളിലെ പരാമർശങ്ങളാണ് ഷൈനിനെ ചർച്ചയാക്കുന്നത്. അഭിമുഖങ്ങളിൽ ഷൈൻ ടോം ചാക്കോയുടെ സംസാരവും പ്രവൃത്തിയും അലോസരകരമാണെന്ന് ഇതിനകം അഭിപ്രായം ഉയർന്നിട്ടുണ്ട്. 

ഷൈൻ ടോം ചാക്കോയെക്കുറിച്ച് നടി ​​ഗ്രേസ് ആന്റണിയുടെ വാക്കുകൾ ശ്രദ്ധ നേടുകയാണ്. അടുത്തിടെ റിലീസ് ചെയ്ത വിവേകാനന്ദൻ വൈറലാണ് എന്ന ചിത്രത്തിൽ ഇരുവരും ഒരുമിച്ച് അഭിനയിച്ചിട്ടുണ്ട്. ഷൂട്ടിം​ഗിനിടെയുണ്ടായ അനുഭവങ്ങളാണ് ഗ്രേസ് ആന്റണി പങ്കുവെച്ചത്.

'എനിക്ക് തോന്നിയിട്ടുള്ളത് പുള്ളി ഒരു പക്ക എന്റർടെയ്നറാണ്. സോഷ്യൽ മീഡിയയിൽ എങ്ങനെ തന്നെത്തന്നെ പ്രസന്റ് ചെയ്യാമെന്ന് വളരെ നന്നായി അറിയാവുന്ന ആളാണ് ഷൈൻ. അതിലൊക്കെ ഞാൻ വളരെ പുറകിലാണ്. ചിലപ്പോൾ അദ്ദേഹത്തിന്റെ ക്യാരക്ടർ അങ്ങനെ ആയത് കൊണ്ടായിരിക്കാം. ഷൂട്ടിം​ഗ് ലൊക്കേഷനിലും ഇങ്ങനെ തന്നെയാണ്. ആക്ഷൻ പറയുമ്പോൾ ആൾ മാറി സീരിയസാവും. 

ലൊക്കേഷനിൽ ഞാനെപ്പോഴും സീരിയസ് ആയിരിക്കും. വർക്കാണ് എനിക്ക് പരമപ്രധാനം. അതിൽ ഞാൻ വളരെ ശ്രദ്ധ കൊടുക്കും. ആരൊക്കെ എന്തൊക്കെ പറഞ്ഞാലും ചിരിക്കില്ല. ഷൈൻ ഈ കിടന്ന് കാണിക്കുന്നതിൽ ബാക്കി എല്ലാവരും ചിരിക്കുന്നുണ്ടെങ്കിലും ഞാൻ അതിനെ കൂടുതൽ എന്റർടെയ്ൻ ചെയ്യില്ല. അതുകൊണ്ട് ഷൈൻ കൂടുതലും എന്റെയടുത്തേക്ക് വരില്ല. അവളുടെയടുത്തേക്ക് പോകണ്ടെന്ന് പറയും. ഒരു തവണ ഞാൻ ഷൈൻ പ്ലീസ്... എന്ന് പറഞ്ഞു. ഷൈൻ പെട്ടെന്ന് വല്ലാതായി. അത് കഴിഞ്ഞ് ഞാൻ വേറൊരു മൂഡിൽ നിൽക്കുകയായിരുന്നു, അതുകൊണ്ടാണെന്ന് ഞാൻ പറഞ്ഞു. അതൊന്നും കുഴപ്പമില്ലെന്നാണ് ഷൈൻ നൽകിയ മറുപടി'യെന്നും ​ഗ്രേസ് ആന്റണി പറഞ്ഞു. മൈൽസ്റ്റോൺ മേക്കേർസുമായുള്ള അഭിമുഖത്തിലാണ്  ​ഗ്രേസ് ആന്റണിയുടെ പ്രതികരണം.