ചൈനയുടെ കരുത്ത് ! സൈന്യത്തിന്റെ ശക്തിപ്രകടനവും ജനങ്ങളുടെ ആവേശവും

പീപ്പിൾസ് റിപ്പബ്ലിക് ഓഫ് ചൈനയുടെയും ചൈനീസ് കമ്യൂണിസ്റ്റ് ഭരണത്തിന്റെയും 70 -മത് വാർഷികാഘോഷങ്ങൾക്ക് ബീജിംഗിൽ തുടക്കമായി. ഇന്ന് ലോകത്തെ ഏറ്റവും വലിയ രണ്ടാമത്തെ സാമ്പത്തികശക്തിയായി ചൈന മാറിക്കഴിഞ്ഞിരിക്കുന്നു.  ചൈനയുടെ കരുത്തു വിളിച്ചോതുന്ന പരേഡിൽ 15000 സൈനികരും 160 യുദ്ധവിമാനങ്ങളും 580 ടാങ്കുകളും മറ്റു ആധുനിക ഡ്രോണുകളും പങ്കെടുക്കുന്നുണ്ട്..

ആഘോഷങ്ങൾ ഗ്രാമീണ മേഖലകളിൽ വരെ എത്തിക്കാനായി 32 ഇഞ്ചിന്റെ 6.20 ലക്ഷം ടീ.വി സെറ്റുകൾ സർക്കാർ സൗജന്യ മായി വിതരണം ചെയ്തുകഴിഞ്ഞു..

ഈ ആഘോഷങ്ങളിൽ ചൈനീസ് രാഷ്ട്രപതി ഷീ ജിൻപിങ് രാജ്യത്തെ ജനങ്ങളെ അഭിസംബോധന ചെയ്തുകൊണ്ട് തന്റെ സർക്കാരിന്റെ നേട്ടങ്ങൾ ജനങ്ങളോട് വിവരിക്കുന്നതാണ്.

1989 ൽ ആയിരങ്ങൾ കൊലചെയ്യപ്പെട്ട ടിയാനന്മെൻ സ്‌ക്വയറിലാണ് ആഘോഷങ്ങൾ കൂടുതലും നടക്കുക എന്നതും ശ്രദ്ധേയമാണ്.മാവോയുടെ വിശാലമായ പോസ്റ്ററുകൾ കയ്യിലേന്തിയ ഒരു പറ്റം യുവാക്കൾ ടിയാന്മെൻ സ്‌ക്വയറിൽ നിന്ന് സ്ഥിരമായി ഉച്ചത്തിൽ മുദ്രാവാക്യം മുഴക്കുന്നുണ്ട്.." കമ്യൂണിസ്റ്റു പാർട്ടിയില്ലാതെ ചൈനയില്ല" എന്ന്.

രാജ്യമെങ്ങും ഉത്സവലഹരിയിലാണ്. സ്‌കൂളുകളിൽ " ഞാൻ എന്റെ രാജ്യത്തെ അളവറ്റു സ്നേഹിക്കുന്നു" എന്ന പേരിൽ പ്രോഗ്രാമുകൾ നടത്തപ്പെടുന്നു. 1921 ലാണ് ചൈനീസ് കമ്യൂണിസ്റ്റ് പാർട്ടി രൂപീകൃതമാകുന്നത്.1946 മുതൽ 1949 വരെനടന്ന മൂന്നുവർഷത്തെ ഗൃഹയുദ്ധത്തിനുശേഷമാണ് 1949 ൽ കമ്യൂണിസ്റ്റ് പാർട്ടി ചൈനയിൽ അധികാരം കയ്യാളുന്നത്. ഈ ദിവസമാണ് ചൈന സ്വാതന്ത്ര്യദിനമായും ആഘോഷിക്കുന്നതും.

ഇതൊക്കെയാണെങ്കിലും ചൈനീസ് നേതൃത്വം ഹോംങ്കോംഗിലെ പ്രക്ഷോഭത്തിലും , ഉയിഗർ മുസ്ലീമുകൾ ഉയർത്തുന്ന പ്രതിഷേധത്തിലും വലിയ അങ്കലാപ്പിലാണ്. അതുമൂലം ആഘോഷങ്ങളിൽ ലൈവ് എന്റർടൈൻ പരിപാടികളും, പട്ടം പറത്തലും ,ആകാശ ഡൈവും ,പ്രാവുപറത്തലുകളും പൂർണ്ണമായും നിരോധിച്ചിരിക്കുകയാണ്. പ്രതിഷേധക്കാർ കടന്നുകയറാതിരിക്കാൻ വൻ സുരക്ഷയാണ് ബീജിംഗിൽ ഒരുക്കിയിരിക്കുന്നത്..