സദ്ബുദ്ധി മഹായജ്ഞം ! ബീഹാർ മുഖ്യമന്ത്രി നിതീഷ് കുമാറിന് സദ്ബുദ്ധി ഉണ്ടാകാൻ യജ്ഞം നടത്തി ലാലു പ്രസാദ് യാദവിന്റെ മൂത്ത മകനും മന്ത്രിയുമായിരുന്ന തേജ് പ്രതാപ് യാദവ് !

പലർക്കും ചിരി വന്നേക്കാം. ബീഹാർ മുൻ മുഖ്യമന്ത്രി ലാലു പ്രസാദ് യാദവിന്റെ മൂത്ത മകനും മുൻ ബീഹാർ പരിസ്ഥിതി വകുപ്പുമന്ത്രിയുമായിരുന്ന തേജ് പ്രതാപ് യാദവ് ഇന്ന് പാറ്റ്നയിൽ ഒരു 'സദ്ബുദ്ധി മഹായജ്ഞം' നടത്തുകയുണ്ടായി.

ബീഹാറിന് പുറത്ത് രാജസ്ഥാനിലെ കോട്ടയുൾപ്പെടെയുള്ള സ്ഥലങ്ങളിൽ കുടുങ്ങിക്കിടക്കുന്ന വിദ്യാർത്ഥികളെ മടക്കിക്കൊണ്ടുവരാൻ മുഖ്യമന്ത്രി നിതീഷ് കുമാറിന് സദ്ബുദ്ധി ഉണ്ടാകാൻ വേണ്ടിയാണ് ഈ യജ്ഞം നടത്തപ്പെട്ടത്.

യജ്ഞം മൂന്നുമണിക്കൂർ നീണ്ടു. വലിയ ഹോമകുണ്ഡത്തിൽ നെയ്യും മറ്റു ദ്രവ്യങ്ങളും പൂക്കളുമർപ്പിച്ചായിരുന്നു മഹായജ്ഞം നടത്തിയത്.

തേജ് പ്രതാപ് യാദവ് ഇങ്ങനെയുള്ള പല വിഷയങ്ങളിലും പ്രസിദ്ധനാണ്. ഇതദ്ദേഹത്തിൻ്റെ ശൈലിയാണ്.

പരമശിവന്റെ വേഷഭൂഷാദികളോടെ ക്ഷേത്രങ്ങൾ സന്ദർശിക്കുക, ശ്രീകൃഷ്ണ വേഷത്തിൽ ഓടക്കുഴലൂതി ഗോശാലകളിൽ കഴിയുക, കുചേല വേഷത്തിൽ ആളുകൾക്കിടയിൽ പ്രത്യക്ഷപ്പെടുക ഒക്കെ അദ്ദേഹത്തിൻറെ രീതികളാണ്.

ഭാര്യ ഐശ്വര്യയുമായുള്ള വിവാഹബന്ധം വേർപെടലിന്റെ വക്കിലാണ്. സ്വയം ദൈവീക പരിവേഷത്തിൽ ജീവിക്കുന്നതും പൂജകളും ക്ഷേത്രദർശനങ്ങളുമാണ് അദ്ദേഹത്തിൻ്റെ ഇഷ്ടകാര്യങ്ങൾ.

തേജ് പ്രതാപ് യാദവിന്റെയും ഐശ്വര്യയുടെയും വിവാഹ സമയത്ത് പാറ്റ്ന നഗരത്തിൽ ഇരുവരെയും ശിവപാർവ്വതിമാരായി ചിത്രീകരിച്ചുകൊണ്ടുള്ള പോസ്റ്ററുകൾ വ്യാപകമായി പതിച്ചിരുന്നു.