ഇംഫാല്: മണിപ്പൂരിൽ സംഘര്ഷം തുടരുന്നതിനിടെ പൊലീസ് തലപ്പത്ത് വൻ അഴിച്ചുപണി. നിലവിലെ ഡിജിപിയായ പി.ദൗഗലിനെയാണ് മാറ്റിയത്. പകരം സിആര്പിഎഫ് ഐജി രാജീവ് സിംഗിനെ പുതിയ ഡിജിപിയായി നിയമിച്ചു. കേന്ദ്ര ആഭ്യന്തരമന്ത്രി അമിത് ഷായുടെ മണിപ്പൂർ സന്ദര്ശനത്തിന് പിന്നാലെയാണ് നടപടി.
ഒരു മാസത്തിലേറെയായി മണിപ്പൂരിൽ പ്രക്ഷോഭം ആളിക്കത്തുകയാണ്. കലാപം പൂര്ണമായി അവസാനിപ്പിക്കാന് പോലീസിന് കഴിയാതിരുന്നതില് കടുത്ത വിമര്ശനം ഉയര്ന്നിരുന്നു. ഇതിന് പിന്നാലെയാണ് അമിത് ഷാ ഉന്നത പൊലീസ്, സൈനിക ഉദ്യോഗസ്ഥരുമായി യോഗം ചേർന്നതും പോലീസ് മേധാവിയെ മാറ്റാൻ നിർദ്ദേശം നൽകിയതും.
അതേസമയം, കാക്ചിങ് ജില്ലയിലെ സുഗ്നുവിൽ കഴിഞ്ഞ രാത്രിയിലും കലാപകാരികളും സുരക്ഷ സേനയും തമ്മിൽ വെടിവെപ്പുണ്ടായി. ഇംഫാൽ ഈസ്റ്റ് മേഖലയിലെ സഗോൽമാങിലുണ്ടായ കലാപകാരികളുടെ വെടിവെപ്പിൽ ഒരാൾക്ക് പരിക്കേറ്റു. ഇതിനിടെ, ദുരിതാശ്വാസ ക്യാമ്പുകളിലേക്കുള്ള അവശ്യസാധനങ്ങൾ കൊണ്ടുപോകുന്നതിനും സുരക്ഷ ജീവനക്കാരുടെ യാത്രയും റോഡ് അടച്ചുകെട്ടിക്കൊണ്ട് തടയരുതെന്ന് മുഖ്യമന്ത്രി എൻ. ബിരേൻ സിങ് അഭ്യർഥിച്ചു.