കടങ്കഥ (കവിത)

നടക്കാത്ത സ്വപ്നങ്ങളെ ചേർത്ത് കെട്ടി

തോണി പണിയണം

പ്രതീക്ഷകളെ പങ്കായമാക്കി

യാത്ര

തുടരണം

ആഴക്കടലിൽ

തിമിംഗലത്തിൻ്റെ

വായിൽ പെടാതെ

 പവിഴപ്പുറ്റുകൾക്കിടയിലൂടെ ഊളിയിട്ട്

മുത്തുച്ചിപ്പികളെ

കോരിയെടുക്കണം

അടർന്നു വീണ

കിനാക്കളെ

ചിറകുകളാക്കി

അനന്തമായ ആകാശത്തേക്ക് പറന്നുയരണം

മേഘക്കൂട്ടിൽ ഒളിഞ്ഞിരിക്കാതെ പെയ്തിറങ്ങണം

അസ്തമയ സൂര്യന് കടങ്കഥകൾ ചൊല്ലി കൊടുക്കണം

കേട്ടിരിക്കാൻ നേരമില്ല 

ചിരി മാഞ്ഞ സന്ധ്യ

കണ്ണിലേക്ക് തുറിച്ച് നോക്കി

കൂട്ടിനാളില്ലാതെ

തനിച്ചായ കടങ്കഥ മനസ്സിനോട് മന്ത്രിച്ചു നമ്മളെന്നും

കടം കഥകൾ മാത്രം

-ലീല കുട്ടായി