ട്രംപ് വൈറ്റ് ഹൗസ് വിടുന്നതിനു മുന്‍പ് അഞ്ചാമത്തെ മുസ്ലിം രാജ്യവുമായി സന്ധി ചെയ്യുമെന്ന് ഇസ്രായേൽ

വാഷിംഗ്ടണ്‍: യുഎസ് പ്രസിഡന്റ് ഡൊണാൾഡ് ട്രംപിന്റെ ഭരണം അവസാനിക്കുന്നതിനു മുന്‍പ് അഞ്ചാം മുസ്‌ലിം രാജ്യവുമായുള്ള ബന്ധം ഔപചാരികമാക്കുന്നതിന് ഇസ്രായേൽ പ്രവർത്തിക്കുന്നുണ്ടെന്ന് ഇസ്രയേൽ മന്ത്രിസഭ.

ഇസ്രയേലും യുണൈറ്റഡ് അറബ് എമിറേറ്റ്സ്, ബഹ്‌റൈൻ, സുഡാൻ, മൊറോക്കോ എന്നീ രാജ്യങ്ങളും തമ്മിലുള്ള ബന്ധം സാധാരണ നിലയിലാക്കാന്‍ വൈറ്റ് ഹൗസ് ഈ വർഷം മധ്യസ്ഥത വഹിച്ചിരുന്നു. ബന്ധങ്ങൾ മെച്ചപ്പെടുത്തുന്നതിനായി റബാത്ത് ചൊവ്വാഴ്ച ഒരു ഇസ്രായേൽ-യുഎസ് പ്രതിനിധി സംഘത്തിന് ആതിഥേയത്വം വഹിക്കുകയും ചെയ്തു.

ജനുവരി 20 ന് ട്രംപ് സ്ഥാനമൊഴിയുന്നതിനുമുമ്പ് അഞ്ചാമത്തെ രാജ്യവുമായി സൗഹൃദ-നയതന്ത്ര ബന്ധം സ്ഥാപിക്കാന്‍ കഴിയുമെന്ന് ഒരു ചാനലിന് നല്‍കിയ അഭിമുഖത്തില്‍ ഇസ്രയേല്‍ പ്രാദേശിക സഹകരണ മന്ത്രി ഒഫിർ അകുനിസ് പറഞ്ഞു. ആ ദിശയിലാണ് ഞങ്ങള്‍ ഇപ്പോള്‍ പ്രവര്‍ത്തിക്കുന്നതെന്നും അദ്ദേഹം പറഞ്ഞു.

ഇസ്രായേലിനെ അംഗീകരിക്കാൻ കൂടുതൽ രാജ്യങ്ങളെ സഹായിക്കാനോ നിലവിലുള്ള ബന്ധങ്ങളെ ഊഷ്മളമാക്കാനോ ശ്രമിക്കുകയാണെന്ന് അഡ്മിനിസ്ട്രേഷൻ അധികൃതർ പറഞ്ഞു. ഇസ്രയേലുമായി സാധാരണ ബന്ധത്തിലേക്ക് നീങ്ങാൻ രണ്ട് പ്രധാന രാജ്യങ്ങള്‍ സന്നദ്ധത പ്രകടിപ്പിച്ചിട്ടുണ്ടെന്ന് അകുനിസ് പറഞ്ഞു.

രാജ്യങ്ങളുടെ പേര് അദ്ദേഹം വെളിപ്പെടുത്തിയില്ലെങ്കിലും ഒരു രാജ്യം ഗള്‍ഫിലാണെന്നും, അത് ഒമാൻ ആകാമെന്നും എന്നാൽ സൗദി അറേബ്യയാകില്ലെന്നും പറഞ്ഞു. മറ്റൊന്ന്, കിഴക്കാണ്. അത് ഒരു ചെറിയ രാജ്യമല്ല. എന്നാല്‍ പാക്കിസ്താനല്ലാത്ത ഒരു മുസ്ലിം രാജ്യം എന്നാണ് അകുനിസ് പറഞ്ഞത്.

ഏറ്റവും കൂടുതൽ ജനസംഖ്യയുള്ള മുസ്‌ലിം രാജ്യമായ ഇന്തോനേഷ്യ കഴിഞ്ഞ ആഴ്ച ഇസ്രായേലിനെ അംഗീകരിക്കില്ലെന്ന് പറഞ്ഞിരുന്നു. മലേഷ്യയും സമാനമായ നയത്തിന് സൂചന നൽകി.

ഫലസ്തീൻ വിഷയത്തിൽ മലേഷ്യയുടെ ഉറച്ച നിലപാടിൽ മാറ്റമുണ്ടാകില്ലെന്ന് ഇസ്രയേൽ തീരുമാനത്തിൽ ക്വാലാലംപൂർ ഇടപെടില്ലെന്നും ഉപ വിദേശകാര്യ മന്ത്രി കമറുദ്ദീൻ ജാഫർ രാജ്യത്തെ സെനറ്റിനെ അറിയിച്ചു.

ഇസ്രയേലുമായി നയതന്ത്രബന്ധം സ്ഥാപിക്കാൻ ബംഗ്ലാദേശിന് താൽപ്പര്യമില്ലെന്ന് ധാക്കയിൽ വിദേശകാര്യ മന്ത്രാലയം ഉദ്യോഗസ്ഥർ പറഞ്ഞു. “ഞങ്ങളുടെ നിലപാട് അതേപടി തുടരുന്നു,” അദ്ദേഹം റോയിട്ടേഴ്സിനോട് പറഞ്ഞു.

അമേരിക്കയുടെ "ബ്രോക്കർ നയതന്ത്ര" നീക്കത്തെ ഒമാൻ പ്രശംസിച്ചുവെങ്കിലും ഇസ്രയേൽ ബന്ധം കെട്ടിപ്പടുക്കുന്നതിനുള്ള സ്വന്തം സാധ്യതകളെക്കുറിച്ച് അഭിപ്രായപ്പെട്ടിട്ടില്ല.