ഉദയനിധി സ്റ്റാലിൻ്റെ മകൻ ഇൻപനിധി സിനിമയിൽ അരങ്ങേറ്റം കുറിക്കുന്നു

ചെന്നൈ:  നടനും നിർമ്മാതാവും തമിഴ്‌നാട് മന്ത്രിയുമായ ഉദയനിധി സ്റ്റാലിൻ്റെ മകൻ ഇൻപനിധി ഉദയനിധി സ്റ്റാലിൻ സിനിമയിൽ അരങ്ങേറ്റം കുറിക്കുന്നു.

ശ്രദ്ധേയ സംവിധായകൻ മാരി സെൽവരാജ് ഒരുക്കുന്ന ചിത്രത്തിലൂടെയാണ് ഇൻപനിധി നായകനായി എത്തുന്നത്. ഈ വാർത്ത തമിഴ് സിനിമാലോകത്ത് വലിയ ചർച്ചയായിരിക്കുകയാണ്.

ഇൻപനിധി ഉദയനിധി സ്റ്റാലിൻ സിനിമയിൽ അരങ്ങേറ്റം കുറിക്കുന്നതോടെ ശ്രദ്ധാകേന്ദ്രമാവുകയാണ്. നാടകാഭിനയ ശിൽപ്പശാലകളിൽ ഇൻപനിധി പങ്കെടുക്കുന്നതിൻ്റെ വീഡിയോ അടുത്തിടെ പുറത്തുവന്നിരുന്നു.

രാഷ്ട്രീയത്തിലും ബിസിനസിലും സജീവം

ഇൻപനിധി ഡി.എം.കെ.യുടെ സമ്മേളനങ്ങളിലും സർക്കാരിൻ്റെ പ്രധാന പരിപാടികളിലും ഇപ്പോൾ സജീവമായി പങ്കെടുക്കുന്നുണ്ട്. മാത്രമല്ല, അടുത്തിടെ റെഡ് ജയന്റ് മൂവീസ് കമ്പനിയുടെ സി.ഇ.ഒ ആയും 21-കാരനായ ഇൻപനിധി ചുമതലയേറ്റിരുന്നു. ഉദയനിധി സ്റ്റാലിൻ 2008-ൽ ആരംഭിച്ച നിർമ്മാണ-വിതരണ കമ്പനിയാണ് റെഡ് ജയന്റ് മൂവീസ്. കലൈഞ്ജർ ടി.വി മാനേജ്‌മെന്റിലും ഇൻപനിധി അംഗമാണ്.