പല്ലെടുത്തോ..? ഈ കാര്യങ്ങള്‍ ശ്രദ്ധിക്കണേ..

പല്ലെടുത്തതിന് ശേഷം രക്തസ്രാവം നിയന്ത്രിക്കാന്‍ പഞ്ഞി കടിച്ചമര്‍ത്തുക, വേദന കുറയ്ക്കാന്‍ ഐസ് പായ്ക്കുകള്‍ ഉപയോഗിക്കുക, 24 മണിക്കൂര്‍ പുകവലിക്കാതിരിക്കുക, കട്ടിയുള്ള ആഹാരം കഴിക്കരുത്, ചൂടുവെള്ളത്തില്‍ ഉപ്പിട്ട് വായ കഴുകുക, വിരല്‍ കൊണ്ട് പല്ലെടുത്ത ഭാഗത്ത് തൊടാതിരിക്കുക തുടങ്ങിയ കാര്യങ്ങള്‍ ശ്രദ്ധിക്കണം. 

രക്തസ്രാവം

45 മിനിറ്റ് നേരം പല്ലെടുത്ത ഭാഗത്ത് പഞ്ഞി വച്ച് മുറുക്കി കടിച്ചു പിടിക്കുക. വീണ്ടും പഞ്ഞി വെക്കരുത്. ഏകദേശം ഒരു മണിക്കൂര്‍ നേരം തുപ്പരുത്. സാധാരണയായി ഉമിനീരില്‍ രക്തത്തിന്റെ അംശം കാണാം, ഇത് ഭയപ്പെടേണ്ടതില്ല. 

ഐസ് പായ്ക്ക്

വേദനയും നീരും കുറയ്ക്കാന്‍ പല്ലെടുത്ത ഭാഗത്ത് ഐസ് പായ്ക്ക് അല്ലെങ്കില്‍ തണുത്ത വെള്ളം വെച്ച ബാഗ് പുറമെ നിന്ന് വെക്കുന്നത് നല്ലതാണ്. ഇത് വേദന കുറയ്ക്കാന്‍ സഹായിക്കും. 

വിശ്രമം

ആദ്യത്തെ ദിവസം വിശ്രമിക്കുകയും അധികം സംസാരിക്കുകയോ ചിരിക്കുകയോ ചെയ്യാതിരിക്കുക. ദിനചര്യകള്‍ പരിമിതപ്പെടുത്തുക. 

ഭക്ഷണം

ആദ്യ ദിവസം തണുത്തതും മൃദലവുമായ ഭക്ഷണം മാത്രം കഴിക്കുക. കഞ്ഞി, പാല്‍, കഞ്ഞിവെള്ളം, കപ്പലണ്ടി പേസ്റ്റ് എന്നിവ ഉദാഹരണമാണ്. 

പുകവലിയും മദ്യപാനവും

24 മണിക്കൂറെങ്കിലും പുകവലിക്കരുത്, ഇത് രക്തസ്രാവത്തിന് കാരണമാകും. 

വ്രണത്തില്‍ തൊടരുത്

പല്ലെടുത്ത ഭാഗത്ത് വിരലോ നാക്കോ കൊണ്ട് തൊടരുത്. അവിടെ വിരല്‍ കൊണ്ട് തൊടുന്നത് അണുബാധയ്ക്ക് കാരണമാകും.