രാജ്യത്തെ 188 ജില്ലകളില്‍ കഴിഞ്ഞ ഏഴ്​ ദിവസങ്ങളിലായി ഒരൊറ്റ കോവിഡ്​ കേസ്​ പോലും റിപ്പോര്‍ട്ട്​ ചെയ്യപ്പെട്ടിട്ടില്ലെന്ന്​ കേന്ദ്ര ആരോഗ്യ മന്ത്രി

ന്യൂഡല്‍ഹി: രാജ്യത്തെ 188 ജില്ലകളില്‍ കഴിഞ്ഞ ഏഴ്​ ദിവസങ്ങളിലായി ഒരൊറ്റ കോവിഡ്​ കേസ്​ പോലും റിപ്പോര്‍ട്ട്​ ചെയ്യപ്പെട്ടിട്ടില്ലെന്ന്​ കേന്ദ്ര ആരോഗ്യ മന്ത്രി വര്‍ഷ്​ വര്‍ധന്‍. മാര്‍ച്ച്‌​ മാസത്തില്‍ തന്നെ 50 വയസിന്​ മുകളിലുള്ളവര്‍ക്ക്​ വാക്​സിന്‍ നല്‍കാനുള്ള സാഹചര്യത്തിലാണ്​ തങ്ങളെന്നും അദ്ദേഹം മാധ്യമങ്ങളോട്​ പറഞ്ഞു.

മുന്‍നിരയില്‍ സേവനം ചെയ്യുന്ന 85 ശതമാനത്തോളം ആരോഗ്യപ്രവര്‍ത്തകര്‍ക്കും ഇതുവരെ വാക്​സിന്‍ കുത്തിവെച്ചിട്ടുണ്ടെന്നും ആരോഗ്യ മന്ത്രി അറിയിച്ചു.

അതേസമയം, രാജ്യത്ത്​ നിലവിലുള്ള 76.5% കോവിഡ്​ കേസുകളും കേരളം, മഹാരാഷ്​ട്ര, കര്‍ണാടക എന്നീ സംസ്ഥാനങ്ങളില്‍ നിന്നുള്ളതാണെന്ന്​ ആരോഗ്യ മന്ത്രാലയം അറിയിച്ചിട്ടുണ്ട്​. 47.5 ശതമാനമുള്ള കേരളത്തിലാണ്​ ഏറ്റവും കൂടുതല്‍ കേസുകളുള്ളത്​. 26.6 ശതമാനമുള്ള മഹാരാഷ്​ട്ര രണ്ടാമതാണ്​. നിലവില്‍ രാജ്യത്ത്​ 1.39 ലക്ഷം കോവിഡ്​ കേസുകളാണ്​ റിപ്പോര്‍ട്ട്​ ചെയ്യപ്പെട്ടിട്ടുള്ളത്​.