ധാർവാഡിലെ മെഡിക്കൽ കോളേജില്‍ പൂർണ്ണമായി വാക്സിനേഷൻ എടുത്ത 182 പേര്‍ക്ക് കൊവിഡ്‌; മെഡിക്കൽ കോളേജ് ഒരു കൊവിഡ്‌ -19 ക്ലസ്റ്ററായി മാറിയെന്ന് അധികൃതർ; സംഘടിപ്പിച്ച ഫ്രെഷേഴ്‌സ് പാർട്ടിയാണ് പകര്‍ച്ച വ്യാധിയ്ക്ക് കാരണമായത് കോളേജില്‍ സംഘടിപ്പിച്ച ഫ്രഷേഴ്‌സ് പാര്‍ട്ടി

ബെം​ഗളുരു: കർണ്ണാടകയിലെ  ധാർവാഡിലെ ഒരു മെഡിക്കൽ കോളേജില്‍ പൂർണ്ണമായി വാക്സിനേഷൻ എടുത്ത 182 പേര്‍ക്ക് കൊവിഡ്‌. മെഡിക്കൽ കോളേജ് ഒരു കൊവിഡ്‌ -19 ക്ലസ്റ്ററായി മാറിയെന്ന് അധികൃതർ അറിയിച്ചു.

ധാർവാഡിലെ എസ്‌ഡിഎം കോളേജ് ഓഫ് മെഡിക്കൽ സയൻസസിലെ രോഗബാധിതരിൽ ഭൂരിഭാഗവും കൊറോണ വൈറസിനെതിരെ പൂർണ്ണമായി വാക്സിനേഷൻ എടുത്തവരാണ്. കാമ്പസിനുള്ളിൽ അടുത്തിടെ സംഘടിപ്പിച്ച ഫ്രെഷേഴ്‌സ് പാർട്ടിയാണ് പകര്‍ച്ച വ്യാധിയ്ക്ക് കാരണമായതെന്ന്‌ അധികൃതർ പറഞ്ഞു.

വ്യാഴാഴ്ച 300-ലധികം വിദ്യാർത്ഥികളുടെ പരിശോധനയെത്തുടർന്ന് കോളേജിലെ പൂർണ്ണമായും വാക്സിനേഷൻ എടുത്ത 66  വിദ്യാർത്ഥികളുടെയും ജീവനക്കാരുടെയും കോവിഡ് പരിശോധനാ ഫലം പോസിറ്റീവായി. കോളേജിൽ നിന്ന് കൂടുതൽ പേരെ ഇന്ന് പരിശോധിക്കുന്നുണ്ട്.

പരിപാടിയെ തുടർന്ന് 400 വിദ്യാർത്ഥികളിൽ 300 പേരെ കൊവിഡ് പരിശോധനയ്ക്ക് വിധേയരാക്കിയപ്പോഴാണ് എസ്ഡിഎം കോളേജ് ഓഫ് മെഡിക്കൽ സയൻസസിലെ വിദ്യാർത്ഥികൾക്ക് രോഗബാധ കണ്ടെത്തിയത്.

രോഗം ബാധിച്ചവരുടെ സാമ്പിളുകൾ ജീനോം സീക്വൻസിങ്ങിനായി അയക്കും. "വിദ്യാർത്ഥികൾക്ക് പൂർണ്ണമായും വാക്സിനേഷൻ നൽകി... പുതിയ വേരിയന്റ് ഉണ്ടോയെന്ന് പരിശോധിക്കാൻ ഞങ്ങൾ കുറച്ച് സാമ്പിളുകൾ ജീനോം സീക്വൻസിംഗിനായി അയയ്ക്കും," ഹെൽത്ത് കമ്മീഷണർ ഡി രൺദീപ് പറഞ്ഞു.

നവംബർ 17ന് കോളേജിൽ നടന്ന ഫ്രെഷേഴ്‌സ് പാർട്ടിയാണ് രോഗബാധയ്ക്ക് ഉത്തരവാദിയെന്ന് ഹെൽത്ത് കമ്മീഷണർ പറഞ്ഞു. ജില്ലാ ഹെൽത്ത് ഓഫീസറുടെയും ഡെപ്യൂട്ടി കമ്മീഷണറുടെയും നിർദ്ദേശപ്രകാരം കോളേജിലെ രണ്ട് ഹോസ്റ്റലുകളും അടച്ചു. ഓഫ് ലൈൻ ക്ലാസുകൾ താൽക്കാലികമായി നിർത്തിവച്ചിരിക്കുകയാണെന്ന് അധികൃതർ അറിയിച്ചു.

രണ്ട് ഡോസ് കൊവിഡ് വാക്‌സിനും എടുത്തതിന് ശേഷവും രോഗബാധിതരായ ഈ വിദ്യാർത്ഥികളെ ക്വാറന്റീൻ ചെയ്‌തതായി ധാർവാഡ് ഡെപ്യൂട്ടി കമ്മീഷണർ നിതേഷ് പാട്ടീൽ പറഞ്ഞു. അവർക്ക് ഹോസ്റ്റലിൽ തന്നെ ചികിത്സ നൽകുമെന്നും അദ്ദേഹം അറിയിച്ചു.