കഞ്ചാവുവേട്ടയുമായി ബന്ധപ്പെട്ട് ഏതെങ്കിലും സംഘടനകളില്‍പ്പെട്ടവര്‍ ഉള്‍പ്പെട്ടിട്ടുണ്ടോയെന്ന് അറിയില്ല: എം.ബി. രാജേഷ്

കൊച്ചി: കഞ്ചാവുവേട്ടയുമായി ബന്ധപ്പെട്ട് ഏതെങ്കിലും സംഘടനകളില്‍ പെട്ടവര്‍ ഉള്‍പ്പെട്ടിട്ടുണ്ടോയെന്ന് അറിയില്ലെന്ന് മന്ത്രി എം.ബി. രാജേഷ്. കളമശേരി പോളിടെക്‌നിക്കിലെ കഞ്ചാവുവേട്ടയുമായി ബന്ധപ്പെട്ട് പ്രതികരിക്കുകയായിരുന്നു അദ്ദേഹം. 

ഏതെങ്കിലും സംഘടനകളില്‍ പെട്ടവര്‍ ഉള്‍പ്പെട്ടിട്ടുണ്ടോയെന്ന് അറിയില്ല. അതൊന്നും സര്‍ക്കാരിന്റെയും എക്സൈസിന്റെയും മുന്നില്‍ വിഷയമേയല്ല. 

ഓരോ സംഘടനയും നടത്തുന്ന പ്രവര്‍ത്തനങ്ങള്‍ കൊണ്ട് കൂടിയാണ് കേരളത്തിന് ലഹരിയെ ചെറുത്ത് നില്‍ക്കാന്‍ സാധിക്കുന്നത്. അരാജക പ്രവണത ചില സംഘടനകളില്‍ പ്രവര്‍ത്തിക്കുന്നവരിലുമുണ്ടാകാം. 

ഏതെങ്കിലും സംഘടനയില്‍ ഉള്‍പ്പെട്ടവരുണ്ടോ, ഏതെങ്കിലും കൊടി പിടിച്ചവരുണ്ടോ എന്നതൊന്നും വിഷയമല്ല. ഒരു തരത്തിലുള്ള ഇളവും ഉണ്ടാവില്ല. ഉരുക്ക് മുഷ്ടി ഉപയോഗിച്ച് ഇത്തരം ശക്തികളെ അമര്‍ച്ച ചെയ്യുക തന്നെ ചെയ്യുമെന്നും അദ്ദേഹം പറഞ്ഞു.