കാനഡ എക്‌സ്പ്രസ് എന്‍ട്രി സിസ്റ്റത്തില്‍ വലിയ മാറ്റങ്ങള്‍. മാതാപിതാക്കളുടെയും മുത്തശ്ശിമാരുടെയും സ്പോണ്‍സര്‍ഷിപ്പ് അപേക്ഷകള്‍ താത്ക്കാലികമായി നിര്‍ത്തി. പുതിയ മാറ്റങ്ങള്‍ ഈ വര്‍ഷം പ്രാബല്യത്തിലാകും

ടൊറന്റോ: കാനഡ എക്‌സ്പ്രസ് എന്‍ട്രി സിസ്റ്റത്തില്‍ വലിയ മാറ്റങ്ങള്‍ പ്രഖ്യാപിച്ചു. പുതിയ മാറ്റങ്ങള്‍ ഈ വര്‍ഷം പ്രാബല്യത്തിലാകും. 

ഫാമിലി ക്ലാസ് സ്ട്രീമിന് കീഴിലുള്ള മാതാപിതാക്കളുടെയും മുത്തശ്ശിമാരുടെയും സ്ഥിര താമസ സ്‌പോണ്‍സര്‍ഷിപ്പുകള്‍ക്കുള്ള പുതിയ അപേക്ഷകള്‍ സ്വീകരിക്കുന്നത് കാനഡ താത്ക്കാലികമായി നിര്‍ത്തി. 

ഗസറ്റില്‍ പ്രസിദ്ധീകരിച്ച ഈ നിര്‍ദ്ദേശം മുന്‍ വര്‍ഷം സമര്‍പ്പിച്ച അപേക്ഷകളുടെ പ്രോസസ്സിംഗിന് മുന്‍ഗണന നല്‍കി കുടുംബ പുനരേകീകരണത്തിനുള്ള സര്‍ക്കാരിന്റെ പ്രതിബദ്ധത ഉറപ്പിക്കുന്നുണ്ട്. 

ഈ സമീപനം ഗവണ്‍മെന്റിന്റെ വിശാലമായ ഇമിഗ്രേഷന്‍, കുടുംബ പുനരേകീകരണ ലക്ഷ്യങ്ങളുമായി ഒത്തുപോകുന്നതായി ഇമിഗ്രേഷന്‍ മന്ത്രി മാര്‍ക്ക് മില്ലര്‍ പറഞ്ഞു. നിലവിലെ ബാക്ക്‌ലോഗ് പരിഹരിക്കുന്നതിന് മറ്റ് ഇമിഗ്രേഷന്‍ സ്ട്രീമുകളും പുതിയ സ്പോണ്‍സര്‍ഷിപ്പുകള്‍ നിര്‍ത്തി.

ഇമിഗ്രേഷന്‍, റഫ്യൂജി, സിറ്റിസണ്‍ഷിപ്പ് മന്ത്രി മാര്‍ക്ക് മില്ലര്‍ കൂടുതല്‍ നിര്‍ദ്ദേശങ്ങള്‍ നല്‍കുന്നതുവരെ താത്ക്കാലികമായി നിര്‍ത്തിയ നടപടി അനിശ്ചിതകാലത്തേക്ക് തുടരും.

അനിശ്ചിതകാലത്തേക്ക് തുടരും

നിയമം ഈ വര്‍ഷം ജനുവരി ഒന്നിന് പ്രാബല്യത്തിലായി. സ്‌പോണ്‍സറുടെ മാതാപിതാക്കളോ മുത്തശ്ശിമാരോ നല്‍കിയ പുതിയ സ്ഥിരതാമസ വിസ അപേക്ഷകളോ ഇതുമായി ബന്ധപ്പെട്ട സ്‌പോണ്‍സര്‍ഷിപ്പ് അപേക്ഷകളോ തുടര്‍ നിര്‍ദ്ദേശങ്ങള്‍ വരുന്നത് വരെ പ്രോസസ്സ് ചെയ്യുന്നില്ലെന്ന് ഉറപ്പാക്കുമെന്ന് അധികൃതര്‍ അറിയിച്ചു. 

പുതിയ സ്ഥിര താമസ അപേക്ഷകള്‍ തടഞ്ഞുവെച്ചിരിക്കുകയാണെങ്കിലും രക്ഷിതാക്കള്‍ക്കും മുത്തശ്ശിമാര്‍ക്കും ദീര്‍ഘകാല, മള്‍ട്ടിപ്പിള്‍ എന്‍ട്രി വിസയായ സൂപ്പര്‍വിസയ്ക്ക് അപേക്ഷിക്കാം.

അടുത്ത മൂന്ന് വര്‍ഷത്തിനുള്ളില്‍ മൊത്തത്തിലുള്ള കുടിയേറ്റം കുറയ്ക്കാന്‍ ലക്ഷ്യമിടുന്ന ഇമിഗ്രേഷന്‍ ലെവല്‍ പ്ലാനിന്റെ ഭാഗമായി ഈ വര്‍ഷം 24,000-ത്തിലധികം വ്യക്തികളെ മാതാപിതാക്കളുടെയും മുത്തച്ഛന്റെയും പ്രോഗ്രാമിലൂടെ പ്രവേശിപ്പിക്കാന്‍ സര്‍ക്കാര്‍ ഉദ്ദേശിക്കുന്നു.

2025-ലെ സ്ഥിരതാമസ ലക്ഷ്യം 500,000-ല്‍ നിന്ന് 395,000 ആയി കുറയ്ക്കാനുള്ള പദ്ധതികളും സര്‍ക്കാര്‍ പ്രഖ്യാപിച്ചിട്ടുണ്ട്. 105,000 ആണ് വെട്ടിക്കുറച്ചത്. 2026-ല്‍ 390,000 ആയും 2027-ഓടെ 365,000 ആയും കുറയ്ക്കുന്നതിലൂടെ കൂടുതല്‍ കുറയ്ക്കലുകള്‍ ആസൂത്രണം ചെയ്തിട്ടുണ്ട്. പ്രധാനമന്ത്രി ജസ്റ്റിന്‍ ട്രൂഡോ ഈ മാറ്റത്തെ പിന്തുണച്ചു.