ശിശു ദിനത്തോടനുബന്ധിച്ച് നവംബർ 14 ന് ആലപ്പുഴ ജില്ലയിലെ സ്കൂൾ അസംബ്ലിയിയിൽ നെഹ്റു അനുസ്മരണം സംഘടിപ്പിക്കാന്‍ തീരുമാനം

ആലപ്പുഴ: ശിശുദിനത്തിൽ നവംബർ 14 ന് സ്ക്കൂൾ അസംബ്ലിയിൽ നെഹ്റു സ്മരണ നടത്തുവാൻ ജില്ല ഭരണകൂടം, ജില്ല പഞ്ചായത്ത്, പൊതു വിദ്യാഭ്യാസ വകുപ്പ്, ആലപ്പുഴ നഗരസഭ, ജവഹർ ബാലഭവൻ, ജില്ലാ ശിശുക്ഷേമ സമിതി എന്നിവരുടെ നേതൃത്വത്തിൽ സംഘടിപ്പിച്ച യോഗം തീരുമാനിച്ചു. ജില്ലയിലെ ശിശുദിന റാലി വിപുലമായ രീതിയിൽ സംഘടിപ്പിക്കാനും ശിശുദിന മത്സരങ്ങൾ ഒക്ടോബർ 17 ന് നടത്തുവാനും തീരുമാനിച്ചു. 

ആഘോഷത്തിൻ്റെ ഭാഗമായി ജില്ലയിലെ എൽ.പി, യു.പി, എച്ച്.എസ്, എച്ച് എസ്.എസ് വിഭാഗങ്ങളിൽ പ്രസംഗം, ക്വിസ്, ശാസ്ത്രീയ സംഗീതം, ലളിതഗാനം, ഉപന്യാസ രചന (മലയാളം, ഇംഗ്ളീഷ്), കഥാ രചന  (മലയാളം, ഇംഗ്ളീഷ്), കവിത രചന (മലയാളം, ഇംഗ്ലീഷ്), ദേശഭക്തിഗാനം (ഗ്രൂപ്പ്), അംഗൻവാടി - നേഴ്സറി വിദ്യാത്ഥികൾക്ക് നിറച്ചാർത്ത് മത്സരം, കഥപറച്ചിൽ, ആംഗ്യ പാട്ട് തുടങ്ങിയ മത്സരങ്ങൾ സംഘടിപ്പിക്കും. 

ജില്ലാതല മത്സര വിജയികൾ തിരുവനന്തപുരത്ത് നടക്കുന്ന സംസ്ഥാന കലോത്സവത്തിൽ  പങ്കെടുക്കുവാൻ അർഹതനേടും. മത്സരാർത്ഥി 20 രൂപ രജിസ്ട്രേഷൻ ഫീസ് നൽകണം. ഒരു മത്സരാർത്ഥിക്ക് മൂന്നിനങ്ങളിൽ മത്സരിക്കാം. 17 ന്  ആലപ്പുഴ ടൗൺ ഹാളിലും ജവഹർ ബാലഭവനിലുമായി വിവിധ വേദികളിലായി മത്സരങ്ങൾ നടക്കും. ഉദ്ഘാടനവും രജിസ്ട്രേഷനും ജവഹർ ബാലഭവനിൽ ആയിരിക്കും. 

മത്സരം രാവിലെ 9.ന് ആരംഭിക്കും. എൽ.പി വിഭാഗം പ്രസംഗ മത്സരത്തിൽ ഒന്നാം സ്ഥാനത്ത് എത്തുന്ന വിദ്യാത്ഥിയായിരിക്കും കുട്ടികളുടെ പ്രധാനമന്ത്രി. നവംബർ 14 ന് നടക്കുന്ന ശിശുദിന റാലിക്ക് നേതൃത്വം നൽകും. 

കളക്ട്രേറ്റ് കോൺഫ്രൻസ് ഹാളിൽ എ.ഡി.എം. എസ്.സന്തോഷ് കുമാർ അദ്ധ്യക്ഷത വഹിച്ചു. മുനിസിപ്പൽ ചെയർപേഴ്സൺ കെ.കെ. ജയമ്മ ഉദ്ഘാടനം ചെയ്തു. കൗൺസിലർ സി.അരവിന്ദാക്ഷൻ, ശിശുക്ഷേമ സമിതി സെക്രട്ടറി കെ.ഡി. ഉദയപ്പൻ, സി.ഡബ്ല്യു.സി ചെയർപേഴ്സൺ അഡ്വ. ജി. വസന്തകുമാരി അമ്മ, ജില്ലാ ശിശുസംരക്ഷണ ഓഫീസർ ടി.വി. മിനിമോൾ, വിദ്യാഭ്യാസ ഡപ്യൂട്ടി ഡയറക്ടർ കെ.കൃഷ്ണകുമാർ, ജവഹർ ബാലഭവൻ എക്സിക്യൂട്ടീവ് ഡയറക്ടർ എസ്.വാഹിദ്, കെ.നാസർ, സി.ശ്രീലേഖ, ടി.വി.നവാസ്, ബി.ഭാസ്ക്കരൻ, കെ.ശിവകുമാർ ജഗ്ഗു, രതീഷ് കുമാർ  എന്നിവർ പ്രസംഗിച്ചു. 

ശിശുദിന ആഘോഷ സംഘാടക സമിതി എച്ച്.സലാം എം.എൽ.എ., ജില്ലാ കളക്ടർ ഹരിത വി.കുമാർ, കെ.ജി.രാജേശ്വരി രക്ഷാധികാരികളായും മുനിസിപ്പൽ ചെയർപേഴ്സൺ കെ.കെ.ജയമ്മ ചെയർമാനായും, വൈസ് ചെയർപേഴ്സൺ മാരായി എം.വി.പ്രിയ, ആർ.വിനീത എന്നിവരേയും ശിശുക്ഷേമ സമിതി ജില്ല സെക്രട്ടറി കെ.ഡി ഉദയപ്പൻ ജനറൽ കൺവീനറായും, വിദ്യാഭ്യാസ ഡപ്യൂട്ടി ഡയറക്ടർ കെ.കൃഷ്ണകുമാർ കോ-ഓർഡിനേറ്ററായും, ജില്ല ശിശു സംരക്ഷണ ഓഫീസർ ടി.വി. മിനിമോൾ റാലികമ്മറ്റിയുടെ കൺവീനറായും, ഫൈനാൻസ് കമ്മറ്റി ചെയർമാനായി എ.ഡി. സി ജനറൽ സന്തോഷ് മാത്യു ഫുഡ് കമ്മറ്റി കൺവീനറായി സി.പി.ജോസഫ്,പബ്ളിസിറ്റി കമ്മറ്റികൺവീനറായി ജില്ല ഇൻഫർമേഷൻ ഓഫീസർ സുമേഷിനേയും, തിരെഞ്ഞെടുത്തു. വിവരങ്ങൾക്ക് 8891010 637.