തദ്ദേശ തിരഞ്ഞെടുപ്പിന് മുന്നോടിയായി ജില്ലയിൽ എക്സൈസ് സ്പെഷ്യൽ ഡ്രൈവ് ആരംഭിച്ചു

ആലപ്പുഴ: തദ്ദേശ സ്വയംഭരണ സ്ഥാപനങ്ങളിലേയ്ക്കുള്ള തിരഞ്ഞെടുപ്പിന് മുന്നോടിയായി മദ്യ–മയക്കുമരുന്നുമായി ബന്ധപ്പെട്ട കുറ്റകൃത്യങ്ങൾ തടയുന്നതിന് എക്സൈസ് വകുപ്പ് എക്സൈസ് എൻഫോഴ്‌സ്‌മെന്റ് പ്രവർത്തനങ്ങൾ ശക്തിപ്പെടുത്തി. ഇതിന്റെ ഭാഗമായി ജില്ലയിൽ ഡിസംബർ 15 വരെ എക്സൈസ് സ്പെഷ്യൽ ഡ്രൈവ് പ്രഖ്യാപിച്ചിട്ടുണ്ട്.

സ്പെഷ്യൽ ഡ്രൈവിന്റെ ഭാഗമായി ആലപ്പുഴ ജനറൽ ആശുപത്രിക്ക് സമീപമുള്ള ഡെപ്യൂട്ടി എക്സൈസ് കമ്മീഷണറുടെ ഓഫീസ് കേന്ദ്രീകരിച്ച് 24 മണിക്കൂറും പ്രവർത്തിക്കുന്ന ജില്ലാതല എക്സൈസ് കൺട്രോൾ റൂം പ്രവർത്തനം ആരംഭിച്ചു.

വ്യാജ മദ്യ നിർമ്മാണം, മദ്യ–മയക്കുമരുന്ന് ഉൾപ്പെടെയുള്ള ലഹരി വസ്തുക്കളുടെ കടത്ത്, വിൽപ്പന, ഉപഭോഗം എന്നിവയുമായി ബന്ധപ്പെട്ട രഹസ്യ വിവരങ്ങൾ പൊതുജനങ്ങൾക്ക് അറിയിക്കാം. 

വിവരങ്ങൾ നൽകുന്നവർ പേര് വെളിപ്പെടുത്തേണ്ടതില്ല. ലഭിക്കുന്ന വിവരങ്ങളെ അടിസ്ഥാനമാക്കി അതീവ രഹസ്യമായി ഉചിതമായ നടപടികൾ സ്വീകരിക്കും. 

കൂടാതെ, രഹസ്യ വിവരങ്ങൾ നൽകുന്നവർക്ക് പിടികൂടുന്ന ലഹരി വസ്തുക്കളുടെ അളവനുസരിച്ച് റിവാർഡ് ചട്ടങ്ങൾ പ്രകാരം പാരിതോഷികവും നൽകുമെന്നും എക്സൈസ് വകുപ്പ് അറിയിച്ചു.

നിയമവിരുദ്ധ പ്രവർത്തനങ്ങൾ ശ്രദ്ധയിൽപ്പെട്ടാൽ ജില്ലാ കൺട്രോൾ റൂമിൽ 18004252696, 155358 (ടോൾ ഫ്രീ) അല്ലെങ്കിൽ 0477-2252049 എന്നീ നമ്പറുകളിൽ അറിയിക്കാം. 

കൺട്രോൾ റൂമിന് പുറമേ എക്സൈസ് എൻഫോഴ്സ്മെന്റ് ആൻഡ് ആന്റി നാർക്കോട്ടിക് സ്പെഷ്യൽ സ്ക്വാഡ്, ഉദ്യോഗസ്ഥർ, സർക്കിൾ, റേഞ്ച് ഓഫീസുകൾ എന്നിവയുമായും ബന്ധപ്പെടാം.