അവധിക്കാലത്ത് ഉല്ലാസയാത്ര പാക്കേജുകളുമായി കെ.എസ്.ആർ.ടി.സി

കൊല്ലം: വേനൽ അവധിക്കാലത്ത് ഉല്ലാസയാത്ര പാക്കേജുകളുമായി കെ.എസ്.ആർ.ടി.സി കൊല്ലം ബജറ്റ് ടൂറിസം. മാർച്ച് 29ന് മൂന്നാർ യാത്രയോടെയാണ് തുടക്കം. 

പുലർച്ചെ അഞ്ചിന് ആരംഭിക്കുന്ന മൂന്നാർ യാത്രയിൽ ഗ്യാപ്പ് റോഡ്, ചിന്നക്കനാൽ, പെരിയക്കനാൽ, കാന്തല്ലൂർ, മറയൂർ എന്നീ സ്ഥലങ്ങൾ സന്ദർശിക്കും. 

മൂന്നാർ സ്ലീപ്പർ ബസ് സ്റ്റേ, കാന്തല്ലൂർ റൈഡിങ്, ഉച്ചഭക്ഷണം എന്നിവ ഉൾപ്പെടെ 2,380 രൂപയാണ് നിരക്ക്.

അന്നുതന്നെ കൊല്ലത്തുനിന്ന് രാവിലെ 10ന് എ.സി ലോ ഫ്ളോർ ബസിലുള്ള എറണാകുളം യാത്രയിൽ അഞ്ച് മണിക്കൂർ അറബിക്കടലിൽ കപ്പൽയാത്രയും ഉണ്ടാകും. 4,240 രൂപയാണ് നിരക്ക്.

മാർച്ച് 30ന് വാഗമൺ യാത്രയും 31ന് തിരുവിതാംകൂറിലെ ശിവക്ഷേത്രങ്ങൾ എന്ന തീർത്ഥാടന യാത്രയും ചാർട്ട് ചെയ്തിട്ടുണ്ട്. ഏപ്രിൽ രണ്ടിന് കൊല്ലത്തുനിന്ന് രാത്രി ഒമ്പതിന് ആരംഭിക്കുന്ന സൈലന്റ് വാലി യാത്രയിൽ കാഞ്ഞിരപ്പുഴ ഡാം, പാലക്കാട് കോട്ട, മലമ്പുഴ, കൽപ്പാത്തി അഗ്രഹാരം, വരിക്കാശ്ശേരി മന എന്നിവയും ഉൾപ്പെടും. 

3080 രൂപയാണ് നിരക്ക്. ഏപ്രിൽ അഞ്ചിന്റെ ഇല്ലിക്കൽ കലി, ഇലവീഴാപൂഞ്ചിറ യാത്രക്ക് 820 രൂപയാണ് നൽകേണ്ടത്. 

അന്നുതന്നെ പുറപ്പെടുന്ന ഇന്ത്യയിലെ ഏറ്റവും വലിയ അഗ്രോ തീം പാർക്ക് മാംഗോ മെഡോസ് യാത്രക്ക് രണ്ടുനേരത്തെ ഭക്ഷണം, പാർക്ക് എൻട്രി ഫീസ്, പാർക്കിനുള്ളിലെ ആക്ടിവിറ്റികൾ ഉൾപ്പെടെയുള്ള പാക്കേജിന് 1790 രൂപയാണ് നൽകേണ്ടത്.

ഏപ്രിൽ ആറിന് രാമക്കൽമേട്, ഒമ്പതിനുള്ള കപ്പൽ യാത്ര എന്നിവക്കും ബുക്കിങ് ആരംഭിച്ചു.

ഏപ്രിൽ 10ന് തിരുനെല്ലി-കൊട്ടിയൂർ യാത്ര വയനാട്, കണ്ണൂർ ജില്ലകളിലെ ക്ഷേത്ര ദർശന തീർത്ഥാടന യാത്രയാണ്. 

രാത്രി മാനന്തവാടിയിലെത്തി വിശ്രമിച്ച ശേഷം രാവിലെ തിരുനെല്ലി, തൃശലേരി കൊട്ടിയൂർ, പറശ്ശിനിക്കടവ് മുത്തപ്പൻ ക്ഷേത്രം എന്നിവ കണ്ടശേഷം മടങ്ങുന്ന യാത്രക്ക് 2,800 രൂപയാണ് നൽകേണ്ടത്. 

11ന് മാമലക്കണ്ടം വഴി മൂന്നാർ യാത്രയും ഉണ്ടാകും. 1730 രൂപയാണ് നിരക്ക്. 13ന് ഗവി, കൃപാസനം, കുമരകം ബോട്ട് യാത്ര എന്നിവയും ഉണ്ടാകും. ഫോൺ: 9747969768,