സിറ്റിസൺ റെസ്പോൺസ് പ്രോഗ്രാം: കർമ്മ സമിതി അംഗങ്ങളുടെ പരിശീലനത്തിന് ആലപ്പുഴ ജില്ലയില്‍ തുടക്കം

ആലപ്പുഴ: സംസ്ഥാനത്തിന്റെ പുരോഗതിക്കും വികസനത്തിനും പുതിയ കരുത്തും ദിശാബോധവും നൽകാൻ ജനങ്ങളുടെ അഭിപ്രായങ്ങൾ ആരായാൻ സംസ്ഥാന സർക്കാർ നടപ്പാക്കുന്ന നവകേരളം സിറ്റിസൺ റെസ്പോൺസ് പ്രോഗ്രാമിന്റെ ഭാഗമായി കർമസമിതി അംഗങ്ങൾക്കുള്ള പരിശീലനത്തിന് ജില്ലയിൽ തുടക്കമായി. 

അരൂർ മണ്ഡലത്തിലെ സമിതി അംഗങ്ങൾക്കുള്ള പരിശീലനമാണ് ആരംഭിച്ചത്. നവകേരളം എന്ന ലക്ഷ്യം സാക്ഷാത്‌കരിക്കുന്നതിന് ആശയങ്ങളും അഭിപ്രായങ്ങളും നിർദേശങ്ങളും ജനങ്ങളിൽ നിന്ന് സമാഹരിക്കുക, ഇപ്പോൾ നടപ്പിലാക്കിക്കൊണ്ടിരിക്കുന്ന വികസന ക്ഷേമ പദ്ധതികൾ കൂടുതൽ കാര്യക്ഷമമാക്കുന്നതിനുള്ള അഭിപ്രായങ്ങൾ പഠിക്കുക, വികസന ക്ഷേമ പരിപാടികൾ എല്ലാ പ്രദേശങ്ങളിലും ആവശ്യകതക്കനുസരിച്ച് ലഭ്യമായോ എന്ന കാര്യത്തിൽ അഭിപ്രായം തേടുക, പുതിയ തൊഴിലവസരങ്ങൾ, വികസന പദ്ധതികൾ എന്നിവയിൽ ജനകീയ അഭിപ്രായം രൂപീകരിക്കുക എന്നിവയാണ് നവകേരളം സിറ്റിസൺസ് റെസ്പോൺസ് പ്രോഗ്രാം - വികസന ക്ഷേമ പഠന പരിപാടിയുടെ ലക്ഷ്യങ്ങൾ. 

വീടുകൾ, തൊഴിൽശാലകൾ, കൃഷിയിടങ്ങൾ, ഫ്ളാറ്റുകൾ, ഉന്നതികൾ, വിദ്യാഭ്യാസ-ആരോഗ്യസ്ഥാപനങ്ങൾ, കുടുംബശ്രീ, ഗ്രാമീണ തൊഴിലുറപ്പ് മേഖലകൾ, പൊതുഇടങ്ങൾ, വ്യാപാര കേന്ദ്രങ്ങൾ ഉൾപ്പെടെ സമൂഹത്തിന്റെ എല്ലാ മേഖലയും കർമ്മസേനാംഗങ്ങൾ സന്ദർശിച്ച് അഭിപ്രായങ്ങൾ ശേഖരിക്കും. 

ജനകീയ പങ്കാളിത്തത്തോടെ നവകേരളം പടുത്തുയർത്താനുള്ള സംസ്ഥാന സർക്കാരിന്റെ പരിശ്രമത്തിന് കൂടുതൽ ആക്കവും ദിശാബോധവും നൽകാനാണ് പഠനപരിപാടി സംഘടിപ്പിക്കുന്നത്. ആവശ്യങ്ങളും അഭിപ്രായങ്ങളും ആശയങ്ങളും സർക്കാരിലേക്ക് എത്തിക്കാനും നവകേരള സൃഷ്‌ടിയിൽ പങ്കുചേരാനും നാട്ടിലെ ഓരോ പൗരനും അവസരം നൽകാനും പദ്ധതിയിലൂടെ കഴിയും. 

ജില്ലാ കളക്ടർ ചെയർമാനായ ജില്ലാതല നിർവാഹക സമിതിയുടെ നേതൃത്വത്തിലാണ് ജില്ലയിലെ പദ്ധതിയുടെ നടപടികൾ പുരോഗമിക്കുന്നത്. 

കുത്തിയതോട് ഗ്രാമപഞ്ചായത്ത് ഹാളിൽ നടന്ന ആദ്യ പരിശീലന പരിപാടിക്ക് സിറ്റിസൺ റെസ്പോൺസ് പ്രോഗ്രാം ജില്ലാതല നിർവാഹക സമിതി കൺവീനറും ജില്ലാ ഇൻഫർമേഷൻ ഓഫീസറുമായ കെ എസ് സുമേഷ്, അംഗങ്ങളായ കെ എസ് രാജേഷ്, പി ജയരാജ്‌, ജെ ജയലാൽ, അരൂർ മണ്ഡലതല ചാർജ് ഓഫീസർ ദേവരാജ് പി കർത്ത തുടങ്ങിയവർ നേതൃത്വം നൽകി. 

ജില്ലയിലെ എല്ലാ നിയമസഭ മണ്ഡലങ്ങളിലും തുടർന്നുള്ള ദിവസങ്ങളിൽ കർമ്മസമിതി അംഗങ്ങൾക്കുള്ള പരിശീലനം നടക്കും. ജനുവരി ഒന്ന് മുതലാണ് കർമ്മസമിതി അംഗങ്ങൾ വീടുകളിലെത്തി വിവര ശേഖരണം നടത്തുക.