സംസ്ഥാന ഐടി മിഷൻ ദേശീയ പുരസ്കാരം നേടി

ദേശീയ പുരസ്കാര നേട്ടവുമായി സംസ്ഥാന ഐടി മിഷൻ. ടെക്നോളജി സഭാ പുരസ്കാരമാണ്‌ ഇ ഗവേണൻസ് മേഖലയിലെ മികച്ച പ്രവർത്തനത്തിന്‌ ലഭിച്ചത്‌.

സംസ്ഥാന ഐടി മിഷന്റെ നേതൃത്വത്തിൽ നടപ്പാക്കുന്ന ഇ -സേവനം ഏകജാലക സേവന പോർട്ടലിനാണ് പുരസ്കാരം ലഭിച്ചത്. പൊതുജനങ്ങളിൽ ഡിജിറ്റൽ സാക്ഷരത ഉറപ്പാക്കാനും ഇ സേവനങ്ങൾ കൃത്യമായി ലഭ്യമാക്കാനുമാണ് ഈ സംവിധാനം.

ഐടി മിഷൻ ഡയറക്ടർ അനു കുമാരി പുരസ്കാരം ഏറ്റുവാങ്ങി. കൊൽക്കത്തയിൽ നടന്ന പരിപാടിയിലായിരുന്നു പുരസ്‌കാര വിതരണം. സംസ്ഥാന ഐടി മിഷന് 2023ലെ ഡിജിറ്റൽ ട്രാൻസ്ഫോർമേഷൻ കോൺക്ലേവിൽ ആദരവ് ലഭിച്ചിരുന്നു.

ഇ ഗവേണൻസ്‌ വഴിയാണ്‌ സംസ്ഥാനത്തെ അക്ഷയ കേന്ദ്രങ്ങളിലും ഫ്രണ്ട്‌സ്‌ സേവന കേന്ദ്രങ്ങളിലും ലഭിക്കുന്ന ഡിജിറ്റൽ സേവനങ്ങളെല്ലാം ലഭ്യമാകുന്നത്. സംസ്ഥാന ഇലക്‌ട്രോണിക്സ്‌ ആൻഡ്‌ വിവരസാങ്കേതിക വിദ്യാ വകുപ്പിന്റെ കീഴിലുള്ള അക്ഷയ പദ്ധതി 2002ലാണ്‌ ആരംഭിച്ചത്‌.

വിവിധ സർക്കാർ പദ്ധതികളിലേക്കുള്ള അപേക്ഷകൾ ഇതിലൂടെയാണ്‌ നൽകുന്നത്. ആധാർ, സർക്കാർ സർട്ടിഫിക്കറ്റുകൾ, സാമൂഹ്യസുരക്ഷാ പെൻഷൻ മസ്റ്ററിങ്‌, സിഎംഡിആർഎഫ്‌, സിഎംഒ പോർട്ടലുകളിലെ അപേക്ഷകൾ, റേഷൻ കാർഡ്‌ തുടങ്ങിയവയുടെയെല്ലാം സേവനങ്ങൾ എളുപ്പമാക്കിയത് ഈ സംവിധാനത്തിലൂടെയായാണ്.