ചവറയില്‍ വനിതാ ഡോക്ടര്‍ക്ക് മര്‍ദനം; ആശുപത്രിയില്‍ വച്ച്‌ മുഖത്തടിയേറ്റു

കൊല്ലം: കൊല്ലം ചവറയില്‍ വനിതാ ഡോക്ടര്‍ക്ക് നേരെ മര്‍ദനം. കൊല്ലം ചവറ സാമൂഹികാരോഗ്യ കേന്ദ്രത്തില്‍ ജോലി ചെയ്യുന്ന ഡോ. ജാന്‍സി ജെയിംസിനാണ് ഇന്നലെ രാത്രി മര്‍ദനമേറ്റത്. രോഗിക്കൊപ്പം എത്തിയ സ്ത്രീ ഡ്യൂട്ടി മെഡിക്കല്‍ ഓഫീസറായിരുന്ന ജാന്‍സി ജെയിംസിന്റെ മുഖത്തടിച്ചുവെന്നാണ് പരാതി.

മുഖത്ത് ശക്തമായ അടിയേറ്റതിനെ തുടര്‍ന്ന് കമ്മല്‍ ഉള്‍പ്പടെ തെറിച്ചുപോയതായും ഡോക്ടറുടെ പരാതിയില്‍ പറയുന്നു.

പൊലീസിനെ സംഭവസമയത്ത് തന്നെ ഡോക്ടറും ആശുപത്രിയിലുള്ള മറ്റുള്ളവരും വിവരം അറിയിച്ചെങ്കിലും അവര്‍ എത്താന്‍ വൈകിയെന്നും സംഭവത്തില്‍ കേസ് എടുത്തില്ലെന്നും ഡോക്ടര്‍ പറയുന്നു. 

പിറ്റേദിവസം ഉച്ചയായിട്ടും പൊലീസ് ആശുപത്രിയിലെത്തി മൊഴി രേഖപ്പെടുത്തിയിട്ടില്ലെന്നും ഡോക്ടര്‍ പറഞ്ഞു. സംഭവത്തില്‍ ഡിഎംഒ തലത്തില്‍ കമ്മീഷണര്‍ക്ക് പരാതി നല്‍കാനാണ് ഡോക്ടര്‍മാരുടെ തീരുമാനം.