ഇടതു സർക്കാർ കെഎസ്ആർടിസി ജീവനക്കാരെ കൊള്ളയടിക്കുന്നു: കെഎസ്‌ടി എംപ്ലോയീസ് സംഘ് സംസ്ഥാന വൈസ് പ്രസിഡൻറ് കെ.രാജേഷ്

പാലക്കാട്: കെഎസ്ആർടിസി ജീവനക്കാർക്ക് ഒരു ഗഡു ഡിഎ പോലും അനുവദിക്കാതെയും പങ്കാളിത്ത പെൻഷനുൾപ്പടെയുള്ള തൊഴിലവകാശങ്ങൾക്കു വേണ്ടി ശമ്പളത്തിൽ നിന്നും ഈടാക്കുന്ന തുക പെൻഷൻ ഫണ്ടിലടക്കാതെയും ഇടതു സർക്കാർ നടത്തുന്നത് പകൽക്കൊള്ളയാണ്. 

പങ്കാളിത്ത പെൻഷൻ പിൻവലിക്കുമെന്ന തെരഞ്ഞെടുപ്പു വാഗ്ദാനം കാറ്റിൽ പറത്തിക്കൊണ്ട് അങ്ങേയറ്റം തൊഴിലാളി വഞ്ചനാപരമായ നിലപാടാണ് സർക്കാർ സ്വീകരിക്കുന്നതെന്ന് കെ എസ് ടി എംപ്ലോയീസ് സംഘ് സംസ്ഥാന വൈസ് പ്രസിഡൻറ് കെ.രാജേഷ് പറഞ്ഞു. 

പാലക്കാട് ജില്ലാ ട്രാൻസ്പോർട്ട് ഓഫീസിനു മുമ്പിൽ എംപ്ലോയീസ് സംഘ് നടത്തുന്ന ഏകദിന ഉപവാസ സമരം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. 

ഡി.എ.കുടിശ്ശിക ഉടൻ അനുവദിക്കുക, പങ്കാളിത്ത പെൻഷൻ അവസാനിപ്പിച്ച് സ്റ്റാറ്റ്യൂട്ടറി പെൻഷൻ പുന:സ്ഥാപിക്കുക, അപേക്ഷിക്കുന്ന മുറക്ക് പി എഫ് ലോൺ അനുവദിക്കുക, എല്ലാ വിഭാഗം ജീവനക്കാർക്കും അർഹമായ പ്രമോഷൻ അനുവദിക്കുക, കേന്ദ്രസർക്കാരിൻ്റെ പുതിയ വേജ് കോഡ് പ്രകാരം എല്ലാ താൽക്കാലിക വിഭാഗം ജീവനക്കാർക്കും തുല്യജോലിക്ക് തുല്യവേതനം/ആനുകൂല്യങ്ങൾ എന്ന നിയമം നടപ്പിലാക്കുക, ശമ്പള പരിഷ്കരണ കരാറിലെ ആനുകൂല്യങ്ങൾ ഉടൻ അനുവദിക്കുക, ജീവനക്കാരുടെ ബാറ്റ് കയ്യിൽ നൽകുക, കെ എസ് ആർ ടി സി ക്ക് പുതിയ ബസ്സുകൾ വാങ്ങി നൽകി റൂട്ടുകൾ സംരക്ഷിക്കുക, ഡ്യൂട്ടികൾ വെട്ടിക്കുറയ്ക്കുന്ന നടപടി അവസാനിപ്പിക്കുക, കെഎസ്ആർടിസിയെ സർക്കാർ ഡിപ്പാർട്ട്മെൻറ് ആക്കി പൊതു ഗതാഗതം സംരക്ഷിക്കുക എന്നീ ആവശ്യങ്ങളുന്നയിച്ച് ഡിസംബർ 16, 17, 18 എന്നീ തിയതികളിലായി മുഴുവൻ ജില്ലകളിലും നടത്തുന്ന ഏകദിന ഉപവാസ സമരത്തിൻ്റെ ഭാഗമായിട്ടാണ് ഈ സമരം സംഘടിപ്പിച്ചത്. 

ജില്ലാ ജോ.സെക്രട്ടറി എം.കണ്ണൻ അദ്ധ്യക്ഷത വഹിച്ച ഉദ്ഘാടന സെഷനിൽ ജില്ലാ സെക്രട്ടറി ടി.വി.രമേഷ്കുമാർ സ്വാഗതം പറഞ്ഞു. ജില്ലാ വൈസ് പ്രസിഡൻറ് പി.ആർ.മഹേഷ്, ജില്ലാ ട്രഷറർ സി.പ്രമോദ്, ജില്ലാ വൈസ് പ്രസിഡൻറ് സി.ശശാങ്കൻ എന്നിവർ സംസാരിച്ചു. 

സംസ്ഥാന സെക്രട്ടറി പി.കെ.ബൈജു, ടി.വി.രമേഷ് കുമാർ, എം.കണ്ണൻ,പി. ആർ.മഹേഷ്, സി.പ്രമോദ്, എൽ.രവിപ്രകാശ്, എം മുരുകേശൻ, യു. തുളസീദാസ്, എം.ഷാജുമോൻ, എ.ചന്ദ്രപ്രകാശ്, പി.പ്രവീൺ, എം. അരുൺ കുമാർ, വി. രാജഗോപാലൻ, എസ്. സുരേഷ്, സി.രതീഷ്, പി.രാമകൃഷ്ണൻ, എ.കെ.പ്രദീപ് കുമാർ എന്നിവർ ഉപവാസമനുഷ്ഠിച്ചു. 

ഉപവാസ സമരത്തിൻ്റെ വിവിധ സെഷനുകളിൽ ബി എം എസ് ജില്ലാ പ്രസിഡൻറ് സലിം തെന്നിലാപുരം, വൈസ്പ്രസിഡൻ്റ് വി.ശിവദാസൻ, ട്രഷറർ വി.ശരത് ജോ.സെക്രട്ടറി ആർ.ഹരിദാസ് സംസ്ഥാന സമിതി അംഗങ്ങളായ പി.കെ. രവീന്ദ്രനാഥ്, കെ.സുധാകരൻ, എസ്. രാജേന്ദ്രൻ, ബിഎംഎസ് നേതാക്കളായ എസ്.അമർനാഥ്, ടി.കുമരേശൻ എന്നിവർ സംസാരിച്ചു.