കേച്ചേരി അക്കിക്കാവ് ബൈപ്പാസ് പ്രവൃത്തി അവസാന ഘട്ടത്തില്‍. തൃശ്ശൂര്‍ - കോഴിക്കോട് റൂട്ടില്‍ പോകുന്ന യാത്രക്കാര്‍ക്ക് ആശ്വാസമായ പദ്ധതിയാണ് കേച്ചേരി അക്കിക്കാവ് ബൈപ്പാസെന്നും മന്ത്രി പി എ മുഹമ്മദ് റിയാസ്

തൃശൂര്‍: കേച്ചേരി അക്കിക്കാവ് ബൈപ്പാസ് പ്രവൃത്തി അവസാന ഘട്ടത്തിലെന്ന് മന്ത്രി പി എ മുഹമ്മദ് റിയാസ്. തൃശൂര്‍ ഇനി ശൂൂൂൂൂ ന്ന് കുതിക്കുമെന്നാണ് മന്ത്രി പറയുന്നത്. തൃശ്ശൂര്‍ - കോഴിക്കോട് റൂട്ടില്‍ പോകുന്ന യാത്രക്കാര്‍ക്ക് ആശ്വാസമായ പദ്ധതിയാണ് കേച്ചേരി അക്കിക്കാവ് ബൈപ്പാസെന്നും മന്ത്രി പറഞ്ഞു.

അതേസമയം, സംസ്ഥാന ബജറ്റില്‍ ഉള്‍പ്പെടുത്തി ബി എം ആന്‍ഡ് ബി സി നിലവാരത്തില്‍ നവീകരിക്കുന്ന തലോര്‍ - തൈക്കാട്ടുശ്ശേരി - വല്ലച്ചിറ റോഡിന്റെ നിര്‍മ്മാണോദ്ഘാടനം പൊതുമരാമത്ത്, ടൂറിസം വകുപ്പ് മന്ത്രി പി എ മുഹമ്മദ് റിയാസ് ഓണ്‍ലൈനായി നിര്‍വ്വഹിച്ചു.

350 ലക്ഷം രൂപ ചിലവിലാണ് റോഡ് നവീകരീക്കുന്നത്. വിവിധ ഭാഗങ്ങളിലായി 4.075 കിലോമീറ്റര്‍ വരുന്ന റോഡ് നവീകരണം സംസ്ഥാനത്തെ റോഡുകളെ അന്താരാഷ്ട്ര നിലവാരത്തിലേക്ക് ഉയര്‍ത്തുന്നതിന് വേണ്ടിയുള്ള പൊതുമരാമത്ത് വകുപ്പ് പദ്ധതിയുടെ ഭാഗമായിട്ടാണ് നടപ്പിലാക്കുന്നത്. 

പുതുക്കാട് എംഎല്‍എ കെ കെ രാമചന്ദ്രന്‍ യോഗത്തിന് അധ്യക്ഷത വഹിച്ചുകൊണ്ട് ശിലാഫലകം അനാഛാദനം നിര്‍വ്വഹിച്ചു. പൊതുമരാമത്ത് നിരത്ത് വിഭാഗം എക്സിക്യൂട്ടിവ് എഞ്ചിനീയര്‍ ഹരീഷ് എസ് സങ്കേതിക റിപ്പോര്‍ട്ട് അവതരിപ്പിച്ചു.