പീച്ചി ഡാം നാളെ തുറക്കും; പുഴകളിൽ ജലനിരപ്പ് ഉയരും, മണലി, കരുവന്നൂർ തീരത്തുള്ളവർ ജാഗ്രത പാലിക്കുക

തൃശ്ശൂർ: പീച്ചി ഡാമിന്റെ വൃഷ്ടിപ്രദേശങ്ങളിൽ വരുന്ന ദിവസങ്ങളിൽ ശക്തമായ മഴയ്ക്ക് സാധ്യതയുണ്ടെന്ന  ഐ.എം.ഡി.യുടെ മുന്നറിയിപ്പിന്റെ പശ്ചാത്തലത്തിൽ, ഡാമിലെ ജലനിരപ്പ് നിയന്ത്രിക്കുന്നതിനായി നാളെ രാവിലെ 9 മണി മുതൽ വെള്ളം തുറന്നുവിടുമെന്ന് പീച്ചി ഹെഡ് വർക്ക്സ് സബ് ഡിവിഷൻ അസിസ്റ്റന്റ് എക്‌സിക്യൂട്ടീവ് എഞ്ചിനീയർ അറിയിച്ചു.

കെഎസ്ഇബിയുടെ ചെറുകിട വൈദ്യുതി ഉത്പാദനനിലയം വഴിയും റിവർ സ്ലൂയിസ് വഴിയുമാണ് വെള്ളം പുറത്തേക്ക് വിടുന്നത്.

ഇതിനാൽ മണലി, കരുവന്നൂർ പുഴകളിലെ നിലവിലെ ജലനിരപ്പിൽ നിന്നും പരമാവധി 20 സെന്റീമീറ്റർ വരെ ഉയരാൻ സാധ്യതയുണ്ട്.

അതുകൊണ്ട്, പുഴകളുടെ തീരത്ത് താമസിക്കുന്നവരും പുഴയോരത്ത് ജോലിയെടുക്കുന്നവരും കർശനമായ ജാഗ്രത പുലർത്തണമെന്ന് അധികൃതർ മുന്നറിയിപ്പ് നൽകി.