മദ്യക്കുപ്പി ഒളിച്ചുവെച്ചെന്നാരോപിച്ച് മകനെ കുത്തിക്കൊല്ലാന്‍ ശ്രമം; പിതാവിനെ പൊലീസ് പിടികൂടി

സുല്‍ത്താന്‍ബത്തേരി: മദ്യകുപ്പി ഒളിപ്പിച്ചുവെച്ചു എന്നാരോപിച്ച് മകനെ കുത്തിക്കൊല്ലാന്‍ ശ്രമിച്ച പിതാവിനെ ബത്തേരി പൊലീസ് അറസ്റ്റ് ചെയ്തു. ബത്തേരി പുത്തന്‍കുന്ന് കരപ്പുറത്ത് വീട്ടില്‍ കെ.എന്‍ വിശ്വംഭരന്‍ (84) ആണ് പിടിയിലായത്. ഇക്കഴിഞ്ഞ പതിനേഴാം തീയ്യതി രാത്രിയായിരുന്നു സംഭവം. 

വിശ്വംഭരന് കുടിക്കാനായി വാങ്ങിവെച്ചിരുന്ന മദ്യക്കുപ്പി വീട്ടില്‍ കാണാതായതിനെ തുടര്‍ന്നാണ് പ്രശ്‌നങ്ങളുടെ തുടക്കം. മദ്യക്കുപ്പി ഒളിപ്പിച്ചു വെച്ചിട്ടുണ്ടെന്ന് പറഞ്ഞ് ഇയാള്‍ മകനെ ആദ്യം മര്‍ദ്ദിക്കുകയും കത്തി കൊണ്ട് നെഞ്ചത്ത് കുത്താന്‍ ശ്രമിക്കുകയുമായിരുന്നു. ആക്രമണം ചെറുക്കുന്നതിനിടെ മകന്റെ ഇടതു കയ്യില്‍ മുറിവേറ്റിരുന്നു.