പ്രതിസന്ധികൾ തരണം ചെയ്യാൻ വിശ്വാസികൾ ഖുർആൻ മുറുകെപിടിക്കണം: കാന്തപുരം; ആത്മീയ സായൂജ്യമേകി മർകസ് ഖുർആൻ സമ്മേളനം

കോഴിക്കോട്: വിശുദ്ധ ഖുർആന്റെ വാർഷികാഘോഷമായ റമളാനിൽ സംസ്ഥാനത്തെ ഏറ്റവും വലിയ ഖുർആൻ സമ്മേളനവുമായി മർകസ്. വിശുദ്ധ ഖുർആന്റെ സന്ദേശങ്ങളും മൂല്യങ്ങളും സമൂഹത്തിൽ പ്രചരിപ്പിക്കുക എന്ന ലക്ഷ്യത്തോടെ സംഘടിപ്പിക്കപ്പെട്ട സമ്മേളനം ഗ്രാൻഡ് മുഫ്തി കാന്തപുരം എ പി അബൂബക്കർ മുസ്‌ലിയാർ ഉദ്ഘാടനം ചെയ്തു.  

വിശ്വാസികൾ ഏറെ പവിത്രമായി കാണുന്ന ലൈലത്തുൽ ഖദ്ർ പ്രതീക്ഷിക്കപ്പെടുന്ന 25-ാം രാവിൽ നടന്ന സമ്മേളനത്തിൽ ദക്ഷിണേന്ത്യൻ സംസ്ഥാനങ്ങളിലെ ആയിരങ്ങൾ സംബന്ധിച്ചു. കമ്യൂണിറ്റി ഇഫ്ത്വാർ, ഗ്രാൻഡ് ഖത്മുൽ ഖുർആൻ, മഹ്ളറത്തുൽ ബദ്‌രിയ്യ, വിർദുലത്വീഫ്, സ്വലാത്തുൽ അവ്വാബീൻ, തസ്ബീഹ് നിസ്കാരം, തൗബ, തഹ്‌ലീൽ തുടങ്ങി വിവിധ ആത്മീയ പ്രാർഥനാ സദസ്സുകളായി നടന്ന സമ്മേളനം പുലർച്ചെ രണ്ടു മണിവരെ നീണ്ടു.

പ്രവാചക പ്രകീർത്തന കാവ്യമായ ഖസീദതുൽ വിത്രിയ്യ പാരായണത്തോടെ രാത്രി 10 30 നാണ് മർകസ് കൺവെൻഷൻ സെന്ററിൽ ഖുർആൻ സമ്മേളനത്തിന്റെ മുഖ്യ ചടങ്ങുകൾക്ക് തുടക്കമായത്. മർകസ് പ്രസിഡന്റ് സയ്യിദ് അലി ബാഫഖി തങ്ങൾ പ്രാർഥന നിർവഹിച്ചു. വിപിഎം ഫൈസി വില്യാപ്പിള്ളി അധ്യക്ഷത വഹിച്ചു. മർകസ് ഡയറക്ടർ ജനറൽ സി മുഹമ്മദ് ഫൈസി ഖുർആൻ പ്രഭാഷണം നിർവഹിച്ചു. ദൗറത്തുൽ ഖുർആൻ, സഹ്‌റത്തുൽ ഖുർആൻ തുടങ്ങി വിവിധ മർകസ് ഖുർആൻ പദ്ധതികളെ അദ്ദേഹം പരിചയപ്പെടുത്തി.

 സമാപന ആത്മീയ സമ്മേളനത്തിന് സയ്യിദ് ശിഹാബുദ്ദീൻ അഹ്ദൽ മുത്തനൂർ നേതൃത്വം നൽകി. സയ്യിദ് ശറഫുദ്ദീൻ ജമലുല്ലൈലി, സയ്യിദ് സൈനുൽ ആബിദീൻ ജമലുല്ലൈലി, ഡോ. ഹുസൈൻ സഖാഫി ചുള്ളിക്കോട്, അബ്ദുൽ അസീസ് സഖാഫി വെള്ളയൂർ, സയ്യിദ് ഫസൽ പൂക്കോയ തങ്ങൾ കരുവൻതുരുത്തി, സി പി ഉബൈദുല്ല സഖാഫി,  കുഞ്ഞിമുഹമ്മദ് സഖാഫി പറവൂർ, അബ്ദു റഊഫ് സഖാഫി, ഡോ. അബ്ദുസ്സലാം, ഉമറലി സഖാഫി എടപ്പുലം, അബ്‌ദുറഹ്‌മാൻ സഖാഫി വാണിയമ്പലം, അബ്ദുൽ ഗഫൂർ സഖാഫി, അബൂബക്കർ സഖാഫി പന്നൂർ, ഹനീഫ് സഖാഫി ആനമങ്ങാട് സംബന്ധിച്ചു.

സാമൂഹിക പ്രശ്നങ്ങളും ജീവിത പ്രതിസന്ധികളും തരണം വിശ്വാസികൾ വിശുദ്ധ ഖുർആൻ  മുറുകെ പിടിക്കണമെന്നും ഖുർആൻ സന്ദേശങ്ങൾ ജീവിതത്തിൽ സമാധാനവും സ്വസ്ഥതയും സാധ്യമാകുമെന്നും കാന്തപുരം എ പി അബൂബക്കർ മുസ്‌ലിയാർ. മർകസ് ഖുർആൻ സമ്മേളനം ഉദ്ഘാടനം ചെയ്ത് പ്രഭാഷണം നടത്തുകയായിരുന്നു അദ്ദേഹം. 

ജനങ്ങൾ തമ്മിലുള്ള സൗഹൃദ ജീവിതവും സാഹോദര്യവും വിളംബരം ചെയ്യുന്ന ഒട്ടേറെ ഖുർആൻ സൂക്തങ്ങൾ ഉണ്ട്. സ്നേഹം, കരുണ, പ്രത്യാശ, സമാധാനം തുടങ്ങിയ മാനവിക മൂല്യങ്ങളാണ് ഖുർആൻ പഠിപ്പിക്കുന്നത്. ഖുർആൻ ജീവിതശൈലിയായി മുറുകെപിടിച്ച വിശ്വാസിക്ക് സമൂഹത്തിലെ ആരെയും ദ്രോഹിക്കാൻ ആവില്ലെന്നും സാമൂഹിക-മാനസിക പ്രശ്നങ്ങളെ അതിജയിക്കാനുള്ള ആത്മധൈര്യം ചരിത്ര പാഠങ്ങളുടെ പിൻബലത്തോടെ ഖുർആൻ പകരുന്നുണ്ടെന്നും അദ്ദേഹം പറഞ്ഞു. ദേശീയ-അന്തർദേശീയ വേദികളിൽ കഴിഞ്ഞ 60 വർഷമായി ഖുർആൻ പ്രഭാഷണങ്ങൾ നടത്തിവരുന്ന ഗ്രാൻഡ് മുഫ്തിയുടെ പ്രഭാഷണം ശ്രവിക്കാൻ നിരവധിപേരാണ് ഇന്നലെ മർകസിൽ എത്തിയത്.