കോവിഡ്​ വ്യാപനം ;​പശ്​ചിമബംഗാളിൽ മെയ്​ 16 മുതൽ 30 വരെ​ ലോക്​ഡൗൺ

നാഷണല്‍ ഡസ്ക്
Saturday, May 15, 2021

കൊൽക്കത്ത: പശ്​ചിമബംഗാളിൽ കോവിഡ്​ വ്യാപനം രൂക്ഷമാകുന്നതിനിടെ രണ്ടാഴ്​ചത്തെ ലോക്​ഡൗൺ പ്രഖ്യാപിച്ചു. മെയ്​ 16 മുതൽ 30 വരെയാണ്​ ലോക്​ഡൗൺ. നാളെ രാവിലെ ആറ്​ മണി മുതൽ ലോക്​ഡൗൺ നിയന്ത്രണങ്ങൾ നിലവിൽ വരും.

എല്ലാ സർക്കാർ, സ്വകാര്യ സ്ഥാപനങ്ങളും അടഞ്ഞു കിടക്കും. അവശ്യ സേവനങ്ങൾ നൽകുന്ന സ്ഥാപനങ്ങൾ പ്രവർത്തിക്കും. ബസ്​, മെട്രോ സർവീസുകൾ ഉണ്ടാവില്ലെന്നും സർക്കാർ അറിയിച്ചു. ഓ​ട്ടോ-ടാക്​സി സർവീസിനും നിയന്ത്രണമുണ്ടാകും.

അവശ്യവസ്​തുകൾ വിൽക്കുന്ന കടകൾ രാവിലെ ആറ്​ മുതൽ 10 മണി വരെ തുറക്കാം. പെട്രോൾ പമ്ബുകൾ സാധാരണപോലെ തുറക്കും. ബാങ്കുകൾക്ക്​ 10 മുതൽ രണ്ട്​ വരെ പ്രവർത്തിക്കാം. 50 ശതമാനം ജീവനക്കാരുമായി തേയില നിർമ്മാണ കമ്ബനികൾക്ക്​ പ്രവർത്തിക്കാമെന്നും സർക്കാർ അറിയിച്ചു.

സാംസ്​കാരിക, വിദ്യാഭ്യാസ, രാഷ്​ട്രീയ, മതപരമായ കൂടിചേരലുകൾ അനുവദിക്കില്ല. വിവാഹങ്ങളിൽ 50 പേർക്ക്​ പ​​ങ്കെടുക്കാം. മരണാനന്തര ചടങ്ങുകളിൽ 20 പേർക്ക്​ പ​ങ്കെടുക്കാനാണ്​ അനുമതി. പശ്​ചിമബംഗാളിൽ കഴിഞ്ഞ ദിവസം 20,846 പേർക്കാണ്​ കോവിഡ്​ സ്ഥിരീകരിച്ചത്​.

×