ഡൽഹിയിൽ ചക്കുളത്തമ്മ പൊങ്കാല ഒക്ടോബർ 28, 29 തീയതികളിൽ

ന്യൂ ഡൽഹി: ഭക്ത മനസുകൾക്ക് പുണ്യം പകരാൻ  21-ാമത് ചക്കുളത്തമ്മ പൊങ്കാല മഹോത്സവം 2023 ഒക്ടോബർ 28-29 ശനി, ഞായർ ദിവസങ്ങളിൽ മയൂർ വിഹാർ ഫേസ് 3-ലെ എ-1 പാർക്കിൽ അരങ്ങേറും.

ചടങ്ങുകൾക്ക് ചക്കുളത്തു കാവ് ക്ഷേത്ര മുഖ്യ കാര്യദർശി ബ്രഹ്മശ്രീ രാധാകൃഷ്ണൻ നമ്പൂതിരി മുഖ്യ കാർമ്മികത്വം വഹിക്കും. ആദ്യ ദിവസമായ ശനിയാഴ്ച്ച രാവിലെ 5-ന് സ്ഥല ശുദ്ധി, 5:15-ന് ഗണപതി ഹോമം, വൈകുന്നേരം 6:25-ന് ദീപാരാധന, 6:30 മുതൽ ബ്രഹ്മശ്രീ രാധാകൃഷ്‌ണൻ നമ്പൂതിരിയുടെ ആത്മീയ പ്രഭാഷണം, 7 മണിക്ക് ശനിദോഷ നിവാരണ പൂജ എന്നിയാണ് ആദ്യ ദിവസത്തെ ചടങ്ങുകൾ.

രണ്ടാം ദിവസം രാവിലെ 5:15-ന് മഹാ ഗണപതി ഹോമത്തോടെ ചടങ്ങുകൾ ആരംഭിക്കും. തുടർന്ന്  പൊങ്കാലയോടനുബന്ധിച്ചുള്ള വിശേഷാൽ പൂജകൾ അരങ്ങേറും. 8:45-ന് ചക്കുളത്തുകാവ് കാര്യദർശി ബ്രഹ്മശ്രീ മണിക്കുട്ടൻ നമ്പൂതിരി ഭദ്രദീപ പ്രകാശനം നിർവഹിക്കും.

9 മണിക്ക് ചക്കുളത്തമ്മ സഞ്ജീവനി ആശ്രമം ചാരിറ്റബിൾ ട്രസ്റ്റ്, ഡൽഹി പ്രസിഡന്റ് സി കേശവൻ കുട്ടിയുടെ അധ്യക്ഷതയിൽ ചേരുന്ന സാംസ്‌കാരിക സമ്മേളനത്തിൽ ഡൽഹിയിലെ സാമൂഹിക സാംസ്‌കാരിക രംഗത്തെ പ്രമുഖർ പങ്കെടുക്കും. തുടർന്ന് ബ്രഹ്മശ്രീ രാധാകൃഷ്‌ണൻ നമ്പൂതിരി അനുഗ്രഹ പ്രഭാഷണം നടത്തും.

ചടങ്ങിൽ 2022-23 അധ്യയന വർഷത്തിൽ സയൻസ്, കോമേഴ്‌സ്, ഹ്യൂമാനിറ്റീസ് എന്നീ ശ്രേണികളിൽ ഉന്നത വിജയം കരസ്ഥമാക്കിയ 12-ാം ക്ലാസിലെ 3 വിദ്യാർത്ഥികൾക്ക് ചക്കുളത്തമ്മ എഡ്യൂക്കേഷണൽ എക്സലൻസ്‌ അവാർഡുകളും വിതരണം ചെയ്യും. അവാർഡുകളുടെ പരിഗണനയ്ക്കായി ഒക്ടോബർ 20 വരെ നിർദ്ധിഷ്ട അപേക്ഷ ഫാറം, ഫോട്ടോ എന്നിവയോടൊപ്പം മാർക്ക് ഷീറ്റുകൾ ഭാരവാഹികൾക്ക് നൽകേണ്ടതാണ്.

9:45-ന് ക്ഷേത്ര ശ്രീകോവിലിൽനിന്നും കൊളുത്തുന്ന ദിവ്യാഗ്നി പണ്ടാര അടുപ്പിലേക്ക് പകരുന്നതോടെ പൊങ്കാലക്ക് ആരംഭമാവും. 10 മണിക്ക് ബിജു ചെങ്ങന്നൂർ നയിക്കുന്ന നാദ തരംഗിണി ഓർക്കസ്‌ട്രാ, ഡൽഹി അവതരിപ്പിക്കുന്ന ഭക്തി ഗാന തരംഗിണി, വിദ്യകലാശം, മഹാകലാശം, പ്രസന്ന പൂജ, പറയിടൽ എന്നിവയും ഉണ്ടാവും. തുടർന്ന് അന്നദാനത്തോടെ ചടങ്ങുകൾക്ക് സമാപനമാകും.

കൂടുതൽ വിവരങ്ങൾക്കും പൊങ്കാലയും മറ്റു വഴിപാടുകളും മുൻകൂട്ടി ബുക്ക് ചെയ്യുന്നതിനുമായി 8130595922, 9810477949, 9650699114, 9818697285 എന്നീ നമ്പറുകളിൽ ബന്ധപ്പെടാവുന്നതാണ്.