കനേഡിയന്‍ പൗരന്‍മാര്‍ക്കുള്ള വിസ നിയന്ത്രണത്തില്‍ ഇളവ് നല്‍കി ഇന്ത്യ

ഡല്‍ഹി; കനേഡിയന്‍ പൗരന്‍മാര്‍ക്കുള്ള വിസ നിയന്ത്രണത്തില്‍ ഇളവ് അനുവദിച്ച് ഇന്ത്യ. എന്‍ട്രി വിസകള്‍, ബിസിനസ് വിസകള്‍, മെഡിക്കല്‍ വിസകള്‍, കോണ്‍ഫറന്‍സ് വിസകള്‍ എന്നിവയാണ് അനുവദിച്ചിരിക്കുന്നത്.

വിയന്ന കൺവെൻഷൻ പ്രകാരം ഇന്ത്യൻ നയതന്ത്ര ഉദ്യോഗസ്ഥർക്ക് കാനഡയിൽ സുരക്ഷ നൽകിയാൽ , വിസ അനുവദിക്കുന്നത് പുനരാരംഭിക്കാൻ താൻ ആഗ്രഹിക്കുന്നുവെന്ന് വിദേശകാര്യ മന്ത്രി എസ് ജയശങ്കർ പറഞ്ഞിരുന്നു. ഇതിനുപിന്നാലെയാണ് വിസ നിയന്ത്രണത്തില്‍ ഇളവ് നല്‍കിയത്. വിസ സേവനങ്ങൾ പുനരാരംഭിക്കുന്നത് ഒക്ടോബർ 26 വ്യാഴാഴ്ച മുതൽ പ്രാബല്യത്തിൽ വരും.

ഖാലിസ്ഥാനി ഭീകരൻ ഹർദീപ് സിംഗ് നിജ്ജാറിന്റെ കൊലപാതകത്തിൽ ഇന്ത്യയെ സംശയ നിഴലിലാക്കി കാനേഡിയൻ പ്രസിഡന്റ് ജസ്റ്റിൻ ട്രൂഡോ പ്രസ്താനയിറക്കിയിരുന്നു. ഖാലിസ്ഥാൻ ടൈഗർ ഫോഴ്‌സ് മേധാവി ഹർദീപ് സിംഗ് നിജ്ജാറിന് വെടിയേറ്റതിന് പിന്നിൽ ഇന്ത്യൻ ഏജന്റുമാരാണെന്ന് പാർലമെന്റിനെ അഭിസംബോധന ചെയ്യവെ ട്രൂഡോ ആരോപിച്ചു.

സറേയിലെ ഗുരു നാനാക് സിഖ് ഗുരുദ്വാരയുടെ പ്രസിഡന്റായും സേവനമനുഷ്ഠിച്ച കനേഡിയൻ പൗരന്റെ കൊലപാതകം "ഇന്ത്യൻ ഗവൺമെന്റിന്റെ ഏജന്റുമാർ" നടത്തിയെന്ന് വിശ്വസിക്കാൻ ദേശീയ സുരക്ഷാ ഉദ്യോഗസ്ഥർക്ക് കാരണങ്ങളുണ്ടെന്ന് ട്രൂഡോ അവകാശപ്പെട്ടു. ഇതിനുപിന്നാലെയാണ് ഇരു രാജ്യങ്ങളും തമ്മിലുള്ള നയതന്ത്ര പ്രതിസന്ധികൾ ആരംഭിച്ചത്.